Иргэд биед тухтай, нимгэн дээлийг сонгох болжээ

Цагаан сарын баярын уур амьсгал хэдийн оржээ. Зах худалдааны төвүүдээр өнгө өнгийн гоёмсог дээлийн худалдаа эхэлсэн байна. Иргэд ч баярын гоёлоо хэдийн зэхээд эхэлжээ. Тэд энэ сарын эхээр дээлээ бэлдээд эхэлсэн гэнэ. Могой  жилийн цагаан сарын дээлийн өнгө донж, хийц загвар, материал чанар, загварын чиг хандлага, үнэ ханшийг сурвалжиллаа.

Хот хөдөөгийн иргэд, жуулчид ихэвчлэн сонгож үйлчлүүлдэг “Дүнжингарав” худалдааны төвийг зорьсон юм. Дээлийн үнэ нь хийц, материалаасаа шалтгаалаад харилцан адилгүй. Тухайлбал, эмэгтэй дээл 180 мянгаас эхэлж байгаа бол эрэгтэй дээл 280 мянгаас эхэлнэ. Монгол цамц 150 мянга. Харин хүүхдийн дээл 65-120 мянгын ханштай худалдаална. Нэгэн цагт загварын дээл эрэлттэй байсан бол одоо нимгэн материалтай, энгийн монгол дээл өмсөх болжээ.

Баярын дээлээ сонгож буй иргэн “Одоо үед дээлийг өдөр тутамдаа өмсөхгүй байна, зөвхөн баяр ёслолоор өмсөх нь түгээмэл болсон. Цагаан сар учраас шинэ дээл өмсөнө. Тиймээс баярын дээлээ сонгохоор явж байна. 2-3 газраар орж дээл сонирхлоо. Материалаасаа хамаараад үнэ нь өөр байна. Загварын дээлнээс илүү энгийн дээл биед тухтай. Би  баяр бүрээр дээл худалдаж авдаггүй. Нэг өнжөөд дээл авдаг. Тэтгэврийн надад дээл үнэтэй байна. Материалыг нь аваад дээл оёсон, худалдаж авсан хоёр үнэ нь дүйцнэ” гэв.

Худалдаа эрхлэгч “Дээлүүд өнгө дагуу материалаар хийсэн бүстэй худалдаалдаг болсон. Хүмүүс цагаан сараар өмсөх дээлээ аваад эхэлсэн. Өмнө жилтэй харьцуулахад дээлийн үнэ нэмэгдээгүй” гэлээ.

Гэр бүлээрээ, хосоороо ижилсэж дээл сонгох нь түгээмэл ажиглагдав. Жил бүр өөр  өөр өнгө тренд болдог. Харин энэ жил хүмүүс үндсэн өнгийн дээл сонгож байгаа ажээ. Үүнд улаан, цэнхэр, ногоон, бор шаргал өнгөнүүд орно. Жилийн өнгө, ээлтэй өнгөө харахаас гадна өөрт зохимжтой дээлийг сонгож байгаа хэмээн хэлэх хүн олон байв. Хот, хөдөөгийн иргэд боломж, бололцоондоо тааруулаад баярын бэлтгэлээ базааж байна.