E-Mongolia систем нэг сарын хугацаанд 7 сая орчим хандалт гадаадаас авчээ

E-Mongolia төрийн цахим үйлчилгээг хилийн чанадад ажиллаж амьдарч байгаа иргэдэд хүртээмжтэй болгох болон боломжит хувилбар, шийдлүүдийг холбогдох байгууллагууд хэлэлцлээ. 

Өнөөдрийн байдлаар E-Mongolia системээс 87 байгууллагын 1263 үйлчилгээг цахимаар авах боломж бүрдсэн.  Нэг сарын хугацаанд 7 сая орчим хандалтыг гадаадаас авсан байна. Энэхүү системд нэвтрэх 3 төрлийн хандалтыг санал болгодог. Гадаадад буй иргэдийн хувьд интернэт банкны эрх болон өөрийн нэр дээрх операторын дугаарын бүртгэлийг ашигладаг. Гадаадад оршин суугаа Монгол Улсын иргэн 816 төрлийн төрийн үйлчилгээг цахимаар авах боломж бүрдсэн. 2018 онд нэг удаагийн код буюу иргэний регистр дээр бүртгэлтэй гар утасны дугаарт нэг удаагийн код илгээх зарчмаар хэрэглэгчийг бүртгэж эхэлсэн. 2020 онд банкны эрх болон тоон гарын үсгийг шинээр нэмж оруулсан байна. Ингэснээр E-Mongolia системд гадаадаас хандах тохиолдол өсөх хандлагатай байна.