АУДИТЫН ДҮГНЭЛТЭЭС: Тэргүүлэх мэргэжилд хамаарахгүй, ач холбогдолгүй мэргэжлээр суралцагчдад зээл олгож байжээ

БЗС-д хийсэн аудитын дүгнэлтийг бид цувралаар хүргэж байгаа билээ. 

Засгийн газраас баталсан тэргүүлэх ач холбогдолтой мэргэжлийн чиглэлд багтаагүй, тэргүүлэх мэргэжилд хамаарахгүй мэргэжлээр 2012-2015 онд 14 суралцагч 1.1 тэрбум, 2017-2018 онд сонгон шалгаруулалтгүй 11 суралцагчид 985 сая буюу нийт 2.5 тэрбум төгрөгийн зөрчил илэрчээ. Мөн дээрх ангилалд багтах бакалаврын хөтөлбөрийн 25 суралцагчдад 799,333,52 ам.долларын зээл олгосон байна.

Тэргүүлэх бус мэргэжлээр суралцсан суралцагчид төгсөөд бүртгэл хийлгээгүй зөрчил мөн илэрчээ. Энэ нь сургуулиа төгсөөгүй байх магадлал өндөр болохыг харуулж байна. Тухайлбал, тус сангаас зээл авч суралцсан УИХ-ын гишүүн Б.Энхбаяр гэхэд тус сургуулиа хэдэн онд төгссөн эсэх нь тодорхойгүй байгааг зарим хэвлэлүүд сурвалжилсан байдаг.

Нэмж мэдээлэхэд, Аудитын шалгалтаар бакалавр, магистр, докторын 177 суралцагчийн материалыг түүвэрчилсэн байдлаар шалгахад л 2.5 тэрбум төгрөгийн зөрчил гарсан байна. Энэ нь зээл бүрийн ард ямар хэмжээний зөрчил байгааг харуулж байна.  

Угтаа улсын магадлан итгэмжлэгдсэн дээд боловсролын сургалтын байгууллагын оюутан болон тэргүүлэх чиглэлийн мэргэжлээр анх удаа бакалавр, магистр, докторын шатлалд суралцаж байгаа суралцагчид шинээр зээлийн хүсэлт гаргах боломжтой.