Хүн амины хэргээр ял сонссон Б.Махбал Хөгжлийн банкны хэргээр дахин яллагдагчаар татагдаад байна

Зам, тээврийн хөгжлийн яамны Төрийн захиргааны удирдлагын газрын дарга асан Б.Махбал нь тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэнгийн аминд хүрсэн хэргээр шүүхээс 13 жилийн хорих ял сонссон. Тэгвэл Хөгжлийн банкны зээлийн асуудалтай холбоотойгоор түүнийг эрүүгийн хуулийн 22.1 Эрх мэдэл, албан тушаалын байдлаа урвуулан ашиглах зүйл ангид буруутгаж яллагдагчаар татжээ. Б.Махбал нь Хөгжлийн банкны ТУЗ-ын гишүүнээр ажиллаж байсан бөгөөд түүнийг Монгол мах экспо, Монгол эм импекс концерн, Бэрэн, Монгол драй милк, Пирамид орд, НВЦ-ийн зээл олголтод хамааралтай гэж үзжээ. 

“Монгол мах экспо” ХХК Мах боловсруулах цогцолбор төв байгуулах төсөл хэрэгжүүлэхээр 2017 онд Хөгжлийн банкнаас 31.9 тэрбум төгрөгийн зээл, Бишрэлт групп ХХК, “Монгол эм импекс концерн” ХХК-тай хамтран Хатуу тунгагдсан эм болон дуслын шингэний үйлдвэр байгуулах төслөөр 2018 онд 7.27 тэрбум төгрөгийн зээл авсан нь Б.Махбалтай холбогдож байгаа бөгөөд эдгээр зээлийн ард Капиталаар овоглож ирсэн Б.Ундармаа байдаг. Мөн түүний хамааралтай зээлүүдийг экс ерөнхийлөгч Х.Баттулгын хамаарал бүхий Пирамид орд ХХК-ийн зээл, УИХ-ын гишүүн Ё.Баатарбилэгтэй холбоотой НВЦ ХХК, Алтай констракшн ХХК-ийн захирал, Монгол Улсын Тод манлай уяач  Х.Бат-Эрдэнийн хамаарал бүхий “Монгол драй милк” ХХК-ийн зээлүүд үргэлжлүүлж байна.