ХЭНТИЙ: Ирэх аравдугаар сараас төрийн албан хаагчдыг “ҮНДЭСНИЙ БИЧИГ”-ийн сургалтад хамруулна

Хэнтий аймаг дахь Эх хэлний бодлогын салбар зөвлөл энэ сарын 28-нд хуралдан ирэх аравдугаар сараас төрийн албан хаагчдаа “ҮНДЭСНИЙ БИЧИГ”-ийн сургалтад хамруулахаар шийдвэрлэжээ. Уг хурлаар Монгол Улсын Засгийн газрын 2020 оны 96 дугаар тогтоолоор баталсан “Монгол бичгийн үндэсний хөтөлбөр III”, “Монгол хэлний тухай хуулийг хэрэгжүүлэх зарим арга хэмжээний тухай” 07 дугаар тогтоолын хэрэгжилтийг хангах, 2025 оноос төрийн болон нутгийн өөрөө удирдах байгууллага албан хэргээ үндэсний хос бичгээр хөтлөн явуулах бэлтгэл ажлын талаар хэлэлцсэн аж. 

Энэ хүрээнд ирэх аравдугаар сараас эхлэн төрийн байгууллагын гадна болон өрөө тасалгааны хаяг, албан хаагчдын нэрийн хуудсыг үндэсний хос бичгээр бичих, албан хаагчдын хос бичгийн мэдлэг чадварыг дээшлүүлэх сургалтын төлөвлөгөөг жил бүр гарган мөрдүүлэх юм байна. Түүнчлэн төрийн байгууллагын албан ёсны цахим хуудас болон хэвлэл мэдээллийн хэрэгслээр түгээж буй мэдээ мэдээллийг хос бичгээр нийтэлдэг байх зэрэг ажлуудыг хэрэгжүүлэх аж.