Талийгаач цэргийг зөвшөөрөлгүй ажилд гаргасан Штабын дарга З.Баярааг ажлаас нь халлаа

Өмнөговь аймагт байрлах Зэвсэгт хүчний 167-р ангийн хугацаат цэргийн алба хаагч 19 настай Н нь 2022 оны долоодугаар сарын 13-нд барилгын хажуунаас нас барсан байдалтай олдсон харамсалтай мэдээллийг манай сэтгүүлч Н.Өнөрцэцэг газар дээрээс нь сурвалжилан хүргэсэн. Талийгаач Н-ыг наадмын өдөр буюу долоодугаар сарын 11-нд Хармагийн талбайд ажиллуулахаар хувийн компани авч явсан байна. 

Тодруулбал, Талийгаач цэргийг ангиас ажил хийлгэхээр гаргахдаа штабын дарга З.Баяраа ямар нэгэн зөвшөөрөлгүй, дур мэдэн "Галтууд" гэх компани руу ажиллуулахаар гаргасан талаар ангийн захирагч, хурандаа Ж.Амаржаргал мэдээлсэн. Гуравхан сарын дараа халагдахаар хүлээж байсан хүүгийнхээ цогцсыг ачаад явж байгаадаа ар гэр нь гомдолтой байгаагаа илэрхийлж байгаа юм.

Видеогоор үзэх:

Тэгвэл талийгаач цэргийг дур мэдэн ангиас гаргаж, "Галтууд" гэх компанийн хармагийн талбайд ажиллуулахаар явуулсан штабын дарга З.Баярааг үүрэгт ажлаас нь чөлөөлөх тушаалыг өчигдөр буюу долдугаар сарын 23-ны өдөр гаргажээ. 

Мөн ангийн захирагч Хурандаа Ж. Амаржаргалыг ажлаас нь чөлөөлөх тушаал маргааш гарна гэх мэдээлэл байна.

Эргэн сануулахад, талийгаач цэргийг өмнө нь ч цэргийн ангиас гаргаж ажил хийлгэдэг байсан бөгөөд олсон мөнгийг нь цэргийн ангийнхаа данс руу авч, ангийн засварт зарцуулдаг байсан гэх мэдээллийг 167-р ангийн захирагч, хурандаа Ж.Амаржаргал мэдээлсэн байдаг. 

Видеогоор үзэх:

ЦЕГ-аас дээрх хэрэгтэй холбогдуулан тус цэргийн ангийн удирдлагуудыг албан тушаалаа урвуулан ашигласан байж болзошгүй гэх үндэслэлээр шалгаж байгаа юм.