Н.Эрдэнэхүү: Урлагийнхны бэлэглэсэн аппарат хамгийн сүүлийн үеийнх, утсаар бол Айфон 14 гэсэн үг

ХСҮТ-д өнөөдөр /2022.07.05/хошин урлагийн жүжигчид хүрэлцэн ирж 2022 оны шинэ загвар бүхий, хиймэл оюун ухаанд суурилсан ЭХО-ны аппарат бэлэглэсэн юм. Жүжигчин Ц.Ганбаяр агсны эмчилгээнд зориулан босгосон хандиваас авч бэлэглэж буй "Эксперт" ангиллын "ZST" платформ бүхий "Resona i9" брэндийн 269 сая төгрөгийн өртөгтэй энэхүү ЭХО-ны аппаратыг ХСҮТ-ийн Ангиографийн тасгийн тусламж үйлчилгээнд хэрэглэх юм. 

Өдөртөө 10-20 хүнд дүрсийн хяналтат оношилгоо, эмчилгээ хийдэг тус тасгийн үйл ажиллагаанд хамгийн сүүлийн үеийн технологи бүхий тоног төхөөрөмжүүд нэн хэрэгцээтэй байдаг бөгөөд анд нөхрийнхөө гэгээн дурсгалыг хүндэтгэн, олон хүний амь насыг хорт хавдраас аврах боломж олгосон хошин урлагийн нийт уран бүтээлчид, Big show-ны хамт олонд ХСҮТ-ийн хамт олон гүн талархал илэрхийлсэн юм. 

Энэ үеэр ХСҮТ-ийн дарга Н.Эрдэнэхүү "Монголд ганцхан байгаа, хамгийн өндөр хүчин чадалтай эхо аппаратыг бид бүхэнд хандивлаж байгаад баяртай байна. Ингэснээр ХСҮТ хоёр аппараттай болж байна.  "Big show"-ны уран бүтээлчдийн бэлэглэсэн аппарат бол хамгийн сүүлийн үеийн эхо аппарат. Тухайн хавдрыг эрт илрүүлэхэд зориулсан, хиймэл оюун ухаантай эхо аппарат. Энэ аппарат нь хамгийн сүүлийн загвар. Утсаар бол айфон 14 гэсэн үг юм. Энэ технологи нь Монгол Улсад хоёр дахь нь" гэдгийг онцлон хэллээ.

Хавдар судлалын үндэсний төв энэ ЭХО-ны аппаратын өмнөх хувилбарыг 2020 онд 4 ширхэгийг улсын төсвийн хөрөнгөөр худалдан авч суурилуулж байсан бол өнөөдөр хиймэл оюун ухаан бүхий хамгийн сүүлийн технологи шингэсэн шинэ аппаратыг ийнхүү хүлээн авлаа.