Үнийн өсөлтийг бууруулах ажлын хэсгийг УИХ-ын гишүүн Ж.Ганбаатар ахална

УИХ-ын дарга Г.Занданшатар хүнсний гол нэрийн болон бусад өргөн хэрэглээний бараа бүтээгдэхүүний үнийн өсөлтөөс шалтгаалсан эрсдэлт хүчин зүйлийг урьдчилан харж, түүнээс улсын эдийн засаг, иргэдийн амьжиргааг сэргийлэн хамгаалах асуудлыг онцгойлон анхаарах шаардлагатай байгааг чуулганы индрээс тодотгосон. 

Энэ хүрээнд Үнийн өсөлтийг бууруулах ажлын хэсгийг Эдийн засгийн байнгын хорооны Ж.Ганбаатараар ахлуулж ажиллахаар болжээ.Тодруулбал, шатахууны үнийг бууруулах, зарим бүтээгдэхүүний үнийн өсөлтийг бууруулахад ямар арга хэмжээ авч болохоор байна. Мөн татвар бууруулах, бусад чиглэлээр арга хэмжээ авах, гадаад, дотоодын яриа хэлэлцээг Засгийн газрын холбогдох яамтай хамтран хийхэд тус ажлын хэсэг ажиллана. 

Мөн ирэх Даваа гаригт УИХ дахь МАН-ын бүлгийн хуралдаанаар үнийн өсөлтийн асуудлыг хэлэлцэж, холбогдох сайд нарын мэдээллийг сонсохоор болжээ.

Улсын хэмжээнд хүнсний бүтээгдэхүүний үнийн өсөлт 18 хувьд хүрсэн нь бүс нутагтаа хамгийн өндөр түвшинд хүрчээ. Тухайлбал, сүүлийн нэг жилийн хугацаанд:

1.    Төмс кг нь 970 төгрөгөөс 2500 төгрөг болж, 158 хувь буюу 2.5 дахин;

2.    Лууван кг нь 2000 төгрөгөөс 4700 төгрөг болж, 135 хувь буюу 2.3 дахин;

3.    Ургамлын тос литр нь 4300 төгрөгөөс 9500 төгрөг болж 121 хувь буюу 2.2 дахин;

4.    Байцаа кг нь 3000 төгрөгөөс 5200 төгрөг болж 73 хувь буюу 1.7 дахин;

5.    Элсэн чихэр кг нь 2700 төгрөгөөс 3750 төгрөг болж 39 хувь;

6.    “Атар” талх ширхэг нь 1280 төгрөгөөс 1700 төгрөг болж, 34 хувь;

7.    “Сүү” ХК-ийн 1 литр сүү 2830 төгрөгөөс 3600 төгрөг болж 27хувь;

8.    Цагаан будаа кг нь 3650 төгрөгөөс 4600 төгрөг болж 26 хувиар үнэ нь нэмэгджээ.