Энэ жилийн төрийн наадмын нээлт стадионд болох нь худлаа болсон уу

Тулгар төрийн 2231, Их Монгол улс байгуулагдсаны 816, Ардын хувьсгалын 100, 101 жилийн баяр наадмыг зохион байгуулах ажил ид өрнөж буй. Хоёр жил дараалан Ковид-19-ын цар тахлын улмаас Улсын баяр наадмыг тэмдэглэлгүй өнжиж, энэ жил  тэгш ойн баяраа өргөн дэлгэр тэмдэглэхээр зэхэж байна. 

Өнгөрсөн долоо хоногт Шадар сайд баяр наадмын бэлтгэл ажлыг газар дээр нь очиж шалгасан ч харамсалтай нь өнөөдрийг хүртэл наадмын нээлт, хаалтын ажиллагааны санхүүжилтийг шийдээгүй байна. Үндэсний их баяр наамдын нээлт, хаалтыг Н.Наранбаатар найруулж,  арга хэмжээг бүхэлд нь Драмын театрт хариуцуулсан. Тэгвэл төрөөс наамдын бэлтгэл ажилд зарцуулах нэг ч төгрөгийг өгөөгүйгээс энэ жилийн төрийн наадмын нээлт стадионд болох нь тун эргэлзээтэй болжээ. Энэ талаар МУГЖ Гочоодоржийн Амгаланбаатар сошиал хуудсаараа мэдэгджээ. 

Тэрбээр "Төр засгаас 100,101 жил гээд л сүржигнээд байх юм. Энэ жилийн төрийн наадмын нээлт стадионд болох нь худлаа боллоо шүү. Ард түмэн минь их юм хүлээгээд хэрэггүй шүү. Өнөөдөр 6 сарын 13 одоо болтол төрөөс шийдэгдсэн мөнгөнөөс ганц ширхэг хадаасны мөнгө ч орж ирээгүй байна.Ид шидтэн л биш бол амжихаа байлаа" гэжээ.

Энэ жилийн наадмаар 3 тэрбум төгрөг зарцуулахаар төсөвлөсөн байсан бол Төсвийн тодотголоор танагдаж, 2.3 тэрбум төгрөг зарцуулахаар болсон.