УИХ-ын чуулганыг завсарлуулж, гишүүд тойрогтоо ажиллана

УИХ дахь МАН-ын бүлэг ирэх Даваа гаригт бүлгийн хуралдаанаараа Үндсэн хуулийн нэмэлт, өөрчлөлтийн сэдэв, чиглэл, түүний үндэслэл, орон нутагт ажиллах удирдамжийн талаар гишүүддээ  мэдээлэл чиглэл өгөхөөр төлөвлөжээ.  

Тодруубал, эрх баригч МАН Үндсэн хуулийн нэмэлт, өөрчлөлтийн талаар ард нийтийн дунд санал асуулга явуулахаар болсон. Энэ хүрээнд УИХ дахь МАН-ын гишүүд энэ сарын 18-ны өдрөөс эхлэн долоо хоног тойрогтоо ажиллаж, Үндсэн хуулийн нэмэлт, өөрчлөлтийн талаар иргэд, сонгогчдод мэдээлэл өгөх юм байна. 

Сануулахад, улс төрийн намууд өчигдөр /2022.06.09/ Үндсэн хуульд, нэмэлт өөрчлөлт оруулах асуудлаар санал гаргаж, улс төрийн “Тунхаг бичиг”-т гарын үсэг зурсан. 

Парламентад суудалтай гурван нам, бусад 21 намын төлөөлөл уг “тунхаг бичиг”-т гарын үсэг зурж, нэмэлт өөрчлөлтөд санал нэгдсэн гэсэн үг.  Улс төрийн намууд Үндсэн хуулийн нэмэлт, өөрчлөлтийн хүрээнд хэлэлцүүлэг өрнүүлээд хагас жил болж байна. Тодруулбал, 2022 оны нэгдүгээр сарын 11-ээс хойш улс төрийн намуудын төлөөлөл 7-8 удаа уулзаж, Монгол Улсын Үндсэн хуульд нэмэлт, өөрчлөлт оруулах тухай асуудалд санал солилцож, саналуудаа нэгтгэсэн.

Зарим улс төрийн нам жагсаал цуглаан зохион байгуулж, тодорхой санал гаргасан юм. Үүнтэй холбогдуулж, төрийн байгуулалтын байнгын хороо асуудлыг хэлэлцээд улмаар МАН-ын бүлэг  Үндсэн хуулийн нэмэлт, өөрчлөлтийг ард нийтээсээ асуух нь зөв гэж улс төрийн шийдвэрээ гаргасан. 

Тиймээс Үндсэн хуулийн нэмэлт, өөрчлөлт иргэдийн дэмжлэгийн үндсэн дээр хийгдэнэ. Улс төрийн намууд Үндсэн хуульд нэмэлт, өөрчлөлт оруулах асуудлыг ярихдаа Үндсэн хуульд нэмэлт, өөрчлөлт оруулах журмын тухай хууль, Хууль тогтоомжийн тухай хуулийг ягштал мөрдөж, хэрэгжүүлж ажиллана гэдэгт санал нэгдсэн билээ.