О.Амартүвшин: Эмээлтийн махны үйлдвэрийн талаар бодит мэдээлэл өгөхгүй бол бизнес эрхлэгчид хохирч байна

МҮХАҮТ-ын Ерөнхийлөгч О.Амартүвшин өөрийн цахим хуудастаа Эмээлтийн махны үйлдвэртэй холбоотой асуудлаар "Эмээлтийн махны үйлдвэрүүдтэй холбоотой асуудалд ул суурьтай хандаж иргэдэд бодитой, тодорхой мэдээллийг зөв өгөх хэрэгтэй байна. Бараг 2 жил махны экспорт хийгдээгүй. Олон компаний үйл ажиллагаа доголдсон хүндхэн байгаа. Стандарт дүрэм журмаа мөрдөж буй олон компани бий. Өнөөдрийн нөхцөл байдал төрийн байгууллагуудын уялдаа холбоо болон хурд ямар байгааг харуулж байна. Авилга нэхэх ашиг сонирхолтой үед бүгд л компаниудын үйл ажиллагаанд саад хийдэг. Хариуцлага хүлээх болохоор эзэн олдохгүй. Махны бизнестэй холбоотой ХХААХҮЯ, Мал эмнэлгийн ерөнхий газар, МХЕГ бүр гадаад яам хүртэл бид асуудлыг мэднэ гэцгээдэг. Эцэст нь бизнес эрхлэгчид л хохирдог. Одоо үүсээд байгаа нөхцөл мах махан бүтээгдэхүүний салбар тэр дундаа экспортод нилээд сөрөг нөлөө үзүүлэхээр байна. Махны холбоо үүнд онцгой анхаарал хандуулах хэрэгтэй. Мэргэжлийн холбоод шинэ түвшинд гарах хэрэгтэй болсон гэдгийг ч харуулж байна. Салбараа хамгаалах, асуудал үүссэн бол яаралтай хянан шалгах, засаж залруулах ёстой. Мэргэжлийн холбоод мэргэжлийн танхим болох ёстой гээд байгаагийн агуулга нь ч энэ юм" хэмээн бичсэн байна.