Зариг.мн сайт хүүхдийг зам тээврийн ослоос урьдчилан сэргийлэх зорилгоор "Тавхан хором төсөл"-ийг амжилттай зохион байгууллаа

Zarig.mn видео сайт 2022 онд нийгмийн тодорхой бүлэг рүү хандсан гурван томоохон төсөл хэрэгжүүлэхээр төлөвлөсний нэг нь хүүхдийг зам тээврийн ослоос урьдчилан сэргийлэх “Тавхан хором хүлээе” төсөл байлаа. Төслийг нийт 45 хоногийн хугацаанд ЦЕГ, ТЦА,  АТҮТ, Албан журмын даатгагчдын холбоо, Баянгол дүүргийн ИТХ зэрэг төрийн болон хувийн хэвшлийн байгууллагуудтай хамтран хэрэгжүүлсэн бөгөөд “Шунхлай” ХХК ерөнхий ивээн тэтгэгчээр ажилласан юм. Өнөөдөр төслийн хаалтыг хийж, хэрэгжүүлсэн ажлуудаа олон нийтэд танилцууллаа.

Төслийг санаачлан хэрэгжүүлэхдээ Нийслэлийн ЕБС, СӨБ-ын School Police-д ашигладаг хантааз, дохиурыг нэгдсэн байдлаар шинэчилэн, цувралаар зургаан анги бүхий хүүхдийн animation бүтээсэн бөгөөд зургадугаар сарын 1-ний өдөр олон нийтэд түгээхээр бэлтгэл ажлаа хангаад байна. Төслийн хугацаанд орон нутаг, нийслэлийн зорчигч тээврийн 770 автобусанд хүүхдийг зам тээврийн ослоос урьдчилан сэргийлэх агуулга бүхий танилцуулга материал хэвлүүлж, байршуулсан бол нийслэлийн нийтийн тээврийн үйлчилгээний 100 автобусны гадна сэрэмжлүүлэг мэдээлэллийг байршуулжээ.  

Түүнчлэн Зорилтот бүлэг болох хүүхдүүдэд зориулж TIK TOK давалгаа явуулж, бодит байдлыг газар дээрээс нь харуулсан 30 удаагийн сурвалжилга хийж, 15 постер мэдээлэл, видео шторк, видео контент бэлтгэн хүргэсэн байна. Мөн төслийн хүрээнд хоёр удаа хэлэлцүүлэг зохион байгуулж, Үндэсний цэцэрлэгт хүрээлэнд хоёр удаа төслийн танилцуулгыг хийжээ.

Өнгөрөгч 2021 онд согтуугаар тээврийн хэрэгсэл жолоодсон 39 мянган жолоочоос 7 мянга нь эрхээ хасуулж 7-30 хоног баривчилгаанд явсан ч дахин согтуугаар тээврийн хэрэгсэл жолоодон замын хөдөлгөөнд оролцож байгаа нь хууль эрхзүйн орчинд зайлшгүй өөрчлөлт оруулах хэрэгцээ байгааг харуулж байна. Тиймээс төслийг хэрэгжүүлэгч Зариг видео сайтын хамт олон “Зөрчлийн тухай” хуульд нэмэлт, өөрчлөлт оруулах хүсэлт хүргүүлэх зэрэг ажлыг хэрэгжүүлэхээр төлөвлөж, 2022-2023 оны хичээлийн жилд ашиглагдах, “Улаанбаатар принт” ХХК-ийн хэвлэх 2 сая дэвтэр дээр зам тээврийн ослоос урьдчилан сэргийлэх анхааруулга бүхий мэдээлэл байршуулах зэрэг ажлыг үргэлжлүүлэн  хийхээр төлөвлөсөн байна.