АМГТГ: “Алтан төхөм” компанид Сэлэнгэ аймгаас нөхөн төлбөр олгох ёстой, тухайн компани хохиролгүй болвол бид зөвшөөрлөө цуцлах боломжтой

Сэлэнгэ аймгийн Хүдэр суманд алт олборлогч "Алтан төхөм" гэх компанийн алт олборлохоор ухсан нүхэнд үүссэн хиймэл нууранд өнгөрсөн жилийн наймдугаар сард 13 настай хүүхэд живж амиа алдсан. Хүүг живсэн газраас хэдхэн алхамын зайд "Алтан төхөм" компани үйл ажиллагаа явуулж байгаа нөхцөл байдлыг бид сурвалжилсан.

Нутгийн иргэдийн хэлж байгаагаар тухайн компани нь 2016 онд алт олборлолт явуулж, газар сэндийчсэн ч нөхөн сэргээлт огт хийгээгүй талаар мэдээлж байгаа юм. Мөн голын ай саваас 50 метрийн зайд үйл ажиллагаа явуулах ёстой гэх хуулийн хэрэгжилт хангагдахгүй, Жалгын голын тархинаас хэдхэн метрийн зайд үйл ажиллагаа явуулж өрөмдлөг хийж байгаа юм. 

Сэлэнгэ аймгийн Хүдэр сумын Жалгын гол нь байгалийн үзэсгэлэн бүрдсэн ой мод, гол бүхий газар. Харамсалтай нь тус газарт алт олборлолт явуулж байгалийг сүйтгээд буй. Жалгын голын орчим нь аймгийн тусгай хэрэгцээнд авсан газар юм. Тусгай хэрэгцээт газар лиценз олгосон асуудлаар бид АМГТГ-аас тодрууллаа. АМГТГ-аас алт олборогч компанийг өмөөрсөн хуулийн заалт ярин сууж байгаа юм.