Г.Ганболд: Хөдөөд залуу малчдыг дэмжих хөтөлбөр хэрэгжүүлэх шаардлагатай

УИХ-ын гишүүн Г.Ганболд өөрийн сонгогдсон тойрог болох Өвөрхангай аймагт ажиллаж, малчид, хөдөлмөр эрхлэгчидтэй уулзлаа. Малчдын хувьд малаас гаралтай түүхий эд, бүтээгдэхүүний үнийг тогтвортой байлгах тал дээр анхаарахыг бодлого тогтоогчдоос хүсэж байна. Энэ асуудлаар УИХ-ын гишүүн Г.Ганболд “Малын гаралтай бүтээгдэхүүнийг экспортлох шаардлагатай гэж малчид үзэж байгаа. Ингэхийн тулд малын гоц халдварт шүлхий өвчинтэй далайцтай тэмцэх шаардлага байгааг хэлж байгаа юм. Жил болгон цөөн тооны мал вакцинжуулдаг. Гэтэл өвчлөл тухайн үедээ дарагддаг ч байнга шүлхий өвчин гардаг. Тиймээс улсын хэмжээнд дорвитой арга хэмжээ авч ажиллаж, халдварыг бүрэн дарах шаардлагатай байгаа талаар малчид онцолж байна. Малын гоц халдварт өвчинг байхгүй болгож чадвал, малын гаралтай бүтээгдэхүүний экспорт нэмэгдэх боломжтой юм. Түүнчлэн малын гаралтай бүтээгдэхүүнийг боловсруулах чиглэлд төрөөс анхаарал хандуулахыг малчид хүсэж байна.

Өвөрхангай аймагт жилд нэг сая малын арьс ширийг урьдчилан боловсруулах үйлдвэр ашиглалтад оруулсан. Мөн жилд 4000 тонн ноос боловсруулах үйлдвэр байна. Гурав, дөрвөн мах боловсруулах үйлдвэр бий. Харамсалтай нь цар тахлын нөлөөлөлтэй холбоотойгоор жигд ажиллаж чадахгүй байгаа. Тэгэхээр экспортыг нэмэгдүүлэхийн тулд хил гаалийн нэвтрүүлэх чадварыг нэмэгдүүлээч гэдэг хүсэлтийг малчид тавьж байна” гэлээ.

Хөдөөд залуу малчдын тоо жил ирэх тусам цөөрч байгааг малчид онцолж байна. Энэ талаар УИХ-ын гишүүн Г.Ганболд “Хөдөөд залуу малчид байхгүй боллоо гэж малчид хэлж байна. Ерөнхий боловсролын сургууль төгссөн залуучууд бүгдээрээ их дээд сургуульд сурдаг. Төгсөөд хот, төв суурин газар ажилладаг. Тиймээс уламжлалт мал аж ахуйгаа авч явах, мал маллах залуучууд байхгүй болж байгааг малчид ярьж байна. Тиймээс төрөөс залуу малчдыг дэмжих, бага хүүтэй зээлээр малжуулах төсөл хөтөлбөрийг хэрэгжүүлж залуучуудыг мал дээр гаргах бодлого хэрэгжүүлээч гэдэг асуудлыг тавьж байна. Малчдын тавьж буй энэ  асуудал зөв. Энэ асуудалд анхаарч ажиллана” гэв.