Хэнтий аймаг тэрбум мод үндэсний хөдөлгөөний хүрээнд 30,0 сая мод тарьж, ургуулна

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг дэмжиж Хэнтий аймаг 2030 он гэхэд 30,0 сая мод тарьж, ургуулахаар төлөвлөсөн. Таригдах модны 80 хувийг ойжуулалтаар, 20 хувийг төв суурин газрын ногоон байгууламжийг нэмэгдүүлэхэд чиглэнэ. Тиймээс иргэдийн мод тарих идэвхи санаачилгыг нэмэгдүүлэх зорилгоор Чингис хотод Эко хот-эрүүл орчин үзэсгэлэн яармагийг зохион байгуулж байна. Тус үзэсгэлэнд Батширээт, Биндэр, Өмнөдэлгэр сумдын сум дундын ойн ангиуд болон Хэрлэн сумын мод үржүүлгийн үйл ажиллагаа эрхэлж байгаа байгууллага, ААН-үүд модны тарьц суулгац, хүнсний ногоо, жимс жимсгэний үр үрсэлгээ, Хүлэмж, хүлэмжний тоног төхөөрөмж, Газар тариалангийн тоног төхөөрөмж  худалдан борлуулж байгаагаас гадна банкууд иргэдэд ногоон зээлийн мэдээлэл өгч, ХХҮГ ногоон ажлын байр хөтөлбөрт иргэдийг бүртгэж байна. Мөн 1кг гялгар уутаар 1 суулгац, 1кг хуванцар савыг 300 төгрөг, ашиглахгүй зай баттарейг ногооны үрээр авах худалдан авах эко худалдааг явууллаа. Түүнчлэн модны суулгац авсан иргэдэд элс, хар шороо, хөх бууцыг үнэ төлбөргүй олгосон байна.