СЗХ-ны дарга Д.Баярсайхан: “Бэлтэс Мөрөн” ХХК-​тай адил мөнгө угаалт бусад аймагт ч гарах эрсдэл байна

Хөвсгөл аймагт 2021 оны дөрөвдүгээр сараас эхлэн “нэмэх даатгал” гэх нэрээр тэтгэврийн даатгалын бүтээгдэхүүнийг олон нийтэд санал болгон, иргэдээс өндөр хүүтэйгээр их хэмжээний мөнгө татан төвлөрүүлж буцааж хуваарилах замаар сүүлийн харилцагчийн мөнгийг эхний харилцагчид өсгөн өгч олон шатлалт маркетинг, пирамид тогтолцооны луйврын аргаар бусдыг залилан мэхлэх гэмт хэрэг үйлдэж байж болзошгүй асуудлаар “Бэлтэс Мөрөн” ХХК -ийг шалгаж эхэлсэн талаар бид дэлгэрэнгүй мэдээлсэн билээ. Тодруулбал, Эрүүгийн хуулийн тусгай ангийн 17.3 дугаар зүйлийн 3 дахь хэсгийн 3.2-т зааснаар хэрэг бүртгэлтийн хэрэг нээж  “Бэлтэс мөрөн ХХК, Баяннөрөөт ХХК-д холбогдох” хэрэгт мөрдөн шалгах ажиллагаа явуулж байна. 

Тэгвэл чуулганы өнөөдрийн хуралдааны үеэр Хөвсгөл аймгаас сонгогдсон УИХ-ын гишүүн Ц.Даваасүрэн  “Бэлтэс Мөрөн” ХХК -ийн талаар тодруулахад Санхүүгийн зохицуулах хорооны дарга Д.Баярсайхан дараах тайлбарыг өглөө. Тэрбээр  “Бэлтэс Мөрөн” ХХК -тай холбогдох асуудал өнгөрсөн оны есдүгээр сараас эхэлж, тухайн үед Санхүүгийн зохицуулах хорооноос зөрчлийн хэрэг нээсэн. Прокуорорын  шбайгууллага харъяаллын дагуу Санхүүгийн зохицуулах хорооны тусгай зөвшөөрөл бүхий этгээд биш байна гэж үзээд хэргийг Цагдаагийн байгууллагад шилжүүлсэн. Санхүүгийн зохицуулах хорооны зүгээс орон нутаг дахь төлөөлөгчтэй хамтран ажиллаж уг хэргийг мөнгө угаалтын хэлбэр байж магадгүй гэж үзээд бүхий зөвлөмжийг өгөөд ажиллаж байна. Бусад аймагт ч  гэсэн энэ төрлийн үйл ажиллагаа давтагдаж магадгүй учраас урьдчилан сэргийлэх үүднээс тухайн аймгууд болон аймгуудын Цагдаагийн газрууд руу мэдэгдэл хүргүүлсэн. Цаашдаа санхүүгийн луйврын схемтэй холбоотой иргэдийн санхүүгийн боловсролыг дээшлүүлэх, болзошгүй эрсдлээс урьдчилан сэргийлэх ажлуудыг хороо дангаараа болон бусад байгууллагатай хамтран ажиллаж байна.