Хэрэв Ерөнхийлөгч асан Ц.Элбэгдорж Минжийн хангай, Нөмрөгт ан хийсэн бол "Эрүүгийн хариуцлага" хүлээх ёстой

ХЗДХ-ийн сайд Х.Нямбаатар орон нутгийн томилолтдоо онгоцтой явсан нь шүүмжлэл дагуулаад байна.

Түүнийг твиттер хуудаст шүүмжлэн бичсэн эмэгтэйд хариу хэлэхдээ Хууль зүй, дотоод хэргийн сайд Х.Нямбаатар: "Чиний эзэн Элбэгдорж шиг чинь Азаргын голд хүүхнүүдтэй зугаалаагүй. Нөмрөг, Минжийн хангайд онгоцоор нисэж, пулемётоор амьтан хядаагүй, ажлаа хийж яваад ирсэн" хэмээн жиргэжээ.

Дээрх жиргээнд Ерөнхийлөгч асан Ц.Элбэгдорж хариу өгөхдөө "Надад алдаж явсан үе бий. Хишиг хүртэж, хувааж байна гэж. Бахархах юм биш. Харамсдаг. Бурууг сануулж, шүүмжилж буй хүмүүсээс уучлалт хүсье. "Пулемёт, онгоц, шалдан.." бол хэтрүүлэг. Иргэдийнхээ санал бодолд хүндэтгэлтэй хандаж, асуудлыг нь шуурхай шийдэхийг эрх баригчдаас хүсье" хэмээн жиргэжээ.

Ерөнхийлөгч асан Ц.Элбэгдорж Нөмрөг, Минжийн Хангайд амьтад хядаж, ан хийсэн гэдгээ хүлээн зөвшөөрсөн утгатай жиргээ нь анхаарал татаж байгаа юм.

Нөмрөг нь Дорнод аймгийн Халх гол суманд байрладаг Дархан цаазат газар. Дархан цаазат газарт ан хийх хуулиар хориотой.

Харин Минжийн Хангай гэх газар нь Улсын тусгай хамгаалалттай газарт ордог эсэх, ан хийх боломжтой эсэхийг тодрууллаа.

Хан хэнтийн улсын тусгай хамгаалалттай газрын хамгаалалтын захиргааны дарга Б.Хашмаргад: Минжийн Хангай нь Хан хэнтийн дархан цаазат газарт багтдаг.  Хан хэнтийг 1992 онд дархан цаазат газар болгож,  2012 онд УИХ-ын 57 дугаар тогтоолоор улсын тусгай хамгаалалтад оруулсан.Энэ улсын хамгаалалттай газар учраас ан хийх нь хориотой.  Минжийн Хангай нь ойн бүс учраас жийпээр ч явахад бэрхшээлтэй газар. Учир нь Дархан цаазат газрын гурван хувийг л тал хээр эзэлдэг. Улсын тусгай хамгаалалттай газар ан хийсэн нь нотлогдвол Эрүүгийн хуулиар хариуцлага хүлээнэ. Дархан цаазат газарт ан хийх ямар ч зөвшөөрөл гэж байхгүй. Галт зэвсэг ч оруулдаггүй газар шүү дээ. Нэгэнт батлагдсан хуулийг Ерөнхийлөгч нь ч дагах ёстой шүү дээ.