"Squid game" цувралын жүжигчин сайн үйлсийн аянд оролцохоор Монголд ирлээ

 БНСУ-ын алдарт зураач И Юн Жон болон тус улсын дэлгэцийн урлагийн од Анупам Трипапти нар Зүрхний төрөлхийн гажигтай хүүхдүүдэд туслах сайн үйлсийн төсөлд нэгдэхээр манай улсад  иржээ.

Уг төслийн хүрээнд хэвлэлийн хурал хийсэн бөгөөд энэ үеэр тэрбээр "Намайг энэ сайхан төслийн арга хэмжээнд урьж оролцуулж байгаад баяртай байна. Олон хүүхдэд туслахыг хүсч байна. Ялангуяа зүрхний яаралтай хагалгаанд орох гэж байгаа хүүхдүүдэд төсөл чиглэгдэх учраас маш их ач холбогдол өгч байгаа. Аль болох олон хүүхдийн амь насыг аврах нь бидний төслийн зорилго. Монгол Улсад анх удаа ирж байна. Сайн байна уу, Баярлалаа гэдэг хоёр үг сурсан. Монголчууд намайг сайхан хүлээж авлаа. Хандивын үйл ажиллагаа маань амжилттай болно гэдэгт итгэлтэй байна" гэлээ.

Анупам Трипаптийг "Squid game" цувралаар нь бид андахгүй. 

“Янжиндулам” ТББ Монгол Улсын алслагдмал, хязгаар нутагт оршин суудаг, эмнэлгийн оношилгоо үйлчилгээнд хамрагдах боломжгүй, төрөлхийн зүрхний гажигтай хүүхдүүдийн хагалгааны зардалд зориулж хандив цуглуулах зорилготой “Beyond the borders” сайн үйлсийн төсөл хэрэгжүүлж эхлээд буй юм.
Энэхүү төслийн хүрээнд хандив цуглуулах зорилгоор БНСУ-ын зураач Lee Yong Jung-ийн уран бүтээлийн үзэсгэлэнг Улаанбаатар хотноо зохион байгуулж, уран зургийн худалдаа болон дуудлага худалдаагаар дамжуулж хандивын сан бүрдүүлэх аж.  Бүрдсэн хандивыг зүрхний мэс засалч Б.Болдсайхан эмчийн санаачилсан “Бундан” санд хандивлах бөгөөд яаралтай эмнэлгийн тусламж авах шаардлагатай, амь нас нь эрсдэлтэй байдалд буй нярай болон бага насны хүүхдийн мэс засалд зарцуулахаар төлөвлөжээ.