Нийслэлийн зургаан дүүрэгт цэрэг татлага эхэллээ

Цар тахлын улмаас өнгөрсөн хоёр жилд нийслэлд цэрэг татлага зохион байгуулагдаагүй. Тэгвэл өнөөдрөөс эхлэн нийслэлд хугацаат цэргийн албаны татлагыг зохион байгуулж байна.

Энэ жил цэрэг татлагыг нийслэлийн зургаан дүүрэгт явуулж, алслагдсан гурван дүүргийг ирэх намрын цэрэг татлагад хамруулах юм. Мөн иргэдийг зөвхөн хилийн болон дотоодын цэргийн анги, салбарын хугацаат цэргийн албанд татах аж.

Нийслэлийн цэрэг татлагыг 6,7,8-ны өдрүүдэд дараах сургуулиудад зохион байгуулна. Үүнд:

• Баянгол дүүрэг – 96 дугаар сургууль
• Баянзүрх дүүрэг – 14 дүгээр сургууль
• Сүхбаатар дүүрэг 31 дүгээр сургууль
• Сонгинохайрхан дүүрэг – 83 дугаар сургууль
• Хан-Уул дүүрэг – 34 дүгээр сургууль
• Чингэлтэй дүүрэг – 5 дугаар сургууль

Дүүрэг бүрийн Цэргийн штаб бэлтгэлээ ханган, УОК-ын зөвлөмж, зааврын дагуу цэрэг татлагын байрыг ариутган, халдваргүйжүүлжээ. Цэргийн албанд татагдагч нь иргэний болон цэргийн үүрэгтний үнэмлэх, их, дээд сургууль төгссөн диплом зэрэг бичиг баримтыг авчирч, тогтоосон хугацаанд цэрэг татлагын байранд ирэх үүрэгтэй.

 Цэргийн алба хааснаар төрийн албанд ажиллах, төрийн үйлчилгээ авах зэрэг олон гарц нээгддэг. Зэвсэгт хүчинд алба хааж буй залуус эх орныхоо бүтээн байгуулалтад оролцож, мөнгөн хуримтлал бий болгон, бие бялдрын хувьд ч өв тэгш болдог.