"Бэлтэс мөрөн" компанид Хөвсгөл аймгийн нэг сумаас гэхэд 700-800 иргэн мөнгөө өгсөн

Хөвсгөл аймагт "Бэлтэс мөрөн" компанид иргэд олноороо мөнгөө өгч, залилуулсан байж болзошгүй нөхцөл байдал үүсээд байна.

Уг асуудлаар "Бэлтэс мөрөн" компанид хохирсон иргэдийг өмгөөлж буй өмгөөлөгч Д.Алтангэрэлээс тодруулахад : Хөвсгөл аймгийн “Бэлтэс мөрөн” компани иргэдэд "бид та нарын мөнгийг аваад ОУ-ын зах зээлд гаргаад эргэж ашиг олоод өсгөж өгнө" гэж хэлээд мөнгийг нь авдаг. Тус компани нь мөн иргэдэд хууль хяналтын байгууллагаас манай компанийн дансан дахь мөнгийг битүүмжилсэн ч үйл ажиллагаа хэвийн гэх зүйлийг ярьж байгаа. Хууль хяналтын байгууллагаас дансыг нь битүүмжилсэн нь үнэн ч тус компанийн нэр дээрх Хаан банкных нь дансанд ямар ч мөнгө байхгүй.Тэр мөнгөө бүгдийг нь бэлнээр авчихсан. Хоёрдугаарт та нараас авсан мөнгөө койн болгоод ОУ-ын зах зээлд гаргаад буцаагаад ашиг олно гэдэг ч тухайн компанид ОУ-ын валютын гүйлгээний ямар ч данс байхгүй хэмээн ярьлаа. 

Харин Цагдаагийн байгууллагаас уг хэргийг шалгаж байгаа бөгөөд маш олон хохирогчтой тул хугацаа орж, ажиллагаа нь удааширч байгаа талаар мэдээлж байгаа юм. Тодруулбал, 24 сумтай Хөвсгөл аймгийн нэг суманд л гэхэд 300-400 иргэн тус компанид залилуулсан бол хамгийн дээд тал нь нэг суманд 700-800 иргэн мөнгөө өгсөн гэх мэдээлэл бий.