ЗГ-ын ээлжит хуралдаанаар хаягийн мэдээллийн нэгдсэн системийг улсын хэмжээнд нэвтрүүлэхээр шийдвэрлэлээ

Монгол Улсын Засгийн газрын 2022 оны 05 дугаар сарын 04-ны өдрийн хуралдаанаар Хаягийн нэгдсэн системийг Улсын хэмжээнд нэвтрүүлэх тухай тогтоолын төслийг хэлэлцэн дэмжиж хэрэгжүүлэхээр боллоо.

Манай улсын хувьд хаягжуулалтын ажил нэгдсэн зохион байгуулалтгүй, хаяг олгох субъект тодорхойгүй байгаагаас үүдэн аймаг, суманд газрын даамал, сум, багийн Засаг дарга, нийслэл, дүүрэгт Газрын алба, Хот байгуулалтын хөгжлийн газар зэрэг байгууллагууд хаяг олгож ирснээр хаягийн давхардал үүсэх, түр хаяг олгох, нэр, дугааргүй задгай гудамжууд олширч Төрийн болон бизнесийн үйлчилгээ, гал команд, түргэн тусламж, хүргэлт, авто тээврийн үйлчилгээ үзүүлэхэд нь эмх цэгцгүй, хүндрэлтэй байдал үүссэж байна.

Иймээс Монгол Улсын хэмжээнд 1:100000 масштабтай газар усны нэрийн тоон зургийн 258,650 газар, усны нэрийг ашиглан 203,525 өвөлжөө, хаваржаа, газар тариалангийн газрын нэгж талбарт, хот, суурин газрын 1,079,000 нэгж талбар, 689,888 барилгын орц, гарцыг тус тус тодорхойлж хаягийг шинэчилсэн бөгөөд цаашид газар, үл хөдлөх, эд хөрөнгөнд хаягийг автоматаар олгох, баталгаажуулах боломжтой олон улсын жишигт нийцсэн системийг байгуулсан.

Хаягийн нэгдсэн системийг Улсын хэмжээнд нэвтрүүлснээр олон улсын жишигт нийцсэн мэдээллийн цогц шинэчлэл хийгдэж төрийн байгууллагуудын мэдээллийн сантай холбогдон цагдаа, түргэн тусламж, онцгой байдал, шуудан, харилцаа холбоо зэрэг иргэн, аж ахуйн нэгж байгууллагууд ашиглах, нэгдсэн стандартад нийцсэн замчлах систем хэрэглээнд нэвтэрнэ.

МОНГОЛ УЛСЫН ЗАСГИЙН ГАЗРЫН ЭЭЛЖИТ ХУРАЛДААНААР “ГУДАМЖ, ЗАМ, ТАЛБАЙ, ҮЛ ХӨДЛӨХ ЭД ХӨРӨНГИЙГ ХАЯГЖУУЛАХ ЖУРАМ”-ЫН НЭМЭЛТ ӨӨРЧЛӨЛТИЙГ ХЭЛЭЛЦЭН БАТЛАХААР БОЛЛОО

Хаягийн нэгдсэн системийг Улсын хэмжээнд нэвтрүүлэх тухай Монгол Улсын Засгийн газрын тогтоолтой холбогдуулан 2019 оны 325 дугаар тогтоолоор батлагдсан “Гудамж, зам, талбай, үл хөдлөх эд хөрөнгийг хаягжуулах журам”-д нэмэлт өөрчлөлтийг оруулсан бөгөөд уг тогтоолын төслийг дэмжиж, батлахаар болов.

Тус журамд нэмэлт өөрчлөлт оруулснаар газар болон үл хөдлөх эд хөрөнгө /барилга, байгууламж/-д хаяг олгох субъектыг тодорхой болгох, хаягжуулалтын ажлын үйл ажиллагааг нарийвчилан зохицуулах, хаягжуулалтын дугаарыг цэгцтэй олгож хэрэглээнд гаргах мөн нэгдсэн системийн үйл ажиллагааг нарийвчилан зохицуулсан журам болж шинэчлэгдлээ.