Б.Жавхлан: Хөгжлийн банкны өрийг хүчний байгууллагуудыг оролцуулан барагдуулна

 Сангийн сайд Б.Жавхлан: Хөгжлийн банкинд Монголбанкнаас 2019 онд хийсэн шалгалт бий. 2023 онд төлүүлэх хоёр томоохон бонд бий. Үүнээс бидний онцгой анхаарах ёстой нь Самурай бонд. Учир нь Засгийн газраас баталгаа гаргасан. Хөгжлийн банкны чанаргүй зээлийг төлүүлэхгүй бол татвар төлөгчдийн мөнгөөр төлөх эрсдэл үүссэн. Одоогийн байдлаар 160 тэрбум төгрөгийн зээлийн эргэн төлөлт хийгдсэн байна. Зээлийн эргэн төлөлтөд орж ирсэн мөнгөөр Самурай бондын мөнгийг төлж эхлэхээр шийдвэр гаргасан. Энэ жилдээ чанаргүй зээлийн гуравний нэгийг төлүүлж, ирэх онд чанаргүй зээлийн мөнгөөр Самурай бондыг төлүүлэх зорилт тавин ажиллаж байна. Самурай бондыг бүрэн төлснөөр татвар төлөгчдийн мөнгөнд тулэх эрсдлийг бууруулна. Чанаргүй зээлийн асуудлаар ажиллахад хуулийн байгууллагын оролцоо их чухал. Үүнд шүүхийн шийдвэр гүйцэтгэх байгууллага, АТГ прокурор, цагдаа зэрэг хүчний байгууллагын оролцоог нэмэгдүүлэхээр болсон. Үүнтэй холбогдуулан Хууль, дотоод хэргийн сайдаар ахлуулсан ажлын хэсэгт хүчний байгууллагын төлөөллийг оролцуулан өр барагдуулах ажлуудыг зохион байгуулна.