Тодруулга: Ослын улмаас 12 хүний биеийн байдал хүнд байгаа тул УБ хотоос нисдэг тэрэг хөөрчээ

Баянхонгор аймгийн Бууцагаан сумын Наран багийн “Цагаан гол” гэдэг газар автобус авто замын хажуу руу онхолдож нэг хүн нас барсан тухай дуудлага 04.27-ны өдрийн 05:00 цагт ОБГ-ын иржээ. Улмаар тус аймгийн Онцгой байдлын газрын тус сум дахь Гал түймэр унтраах, аврах 72 дугаар ангийн алба хаагчид 35 км зам туулан очиход Улаанбаатар хотоос Ховд аймгийн Цэцэг сум руу чиглэлд 21 зорчигчтой зорчиж явсан KLQ6898 загварын автобус онхолдож нэг хүн автобусанд дарагдаж нас барсан талаар мэдээлсэн. 

Бид уг асуудлаар Баянхонгор аймгийн Онцгой байдлын газрын дарга, хурандаа Ж.Алтангэрэлээс тодрууллаа. 

Ж.Алтангэрэл: Тухайн автобус Улаанбаатар хотоос энэ сарын 26-нд Ховд аймгийг чиглэн гарсан юм билээ. Ховд аймгийн Цэцэг гэх суманд байрлах Хөшөөтийн уурхай руу явж байсан "Алтан зам визон" ХК-ийн хамтран ажилладаг өрөм тэсэлгээний компани "Мега сервис" компанийн ажилчдын 21 хүнтэй автобус замын хажуу руу унасан байна гэх дуудлага манай аймгийн Бууцагаан сумын ОБГ-т  ирсэн. Энэ бол 45 хүний суудалтай том оврын автобус байсан. 21 хүн зорчиж явсан, нэг эрэгтэй газар дээрээ нас барсан. 12 хүн гэмтэж, бэртсэн. Таван иргэний биеийн байдал нэн хүнд, долоон иргэнийх хүндэвтэр байна. Бусад хүмүүс хөнгөн, биеийн байдал хэвийн. Аймгаас цагдаа, онцгой, нарийн мэргэжлийн эмч нар оччихсон эрэмблээд үзлэг хийж байна. Ослын шалтгаан нөхцлийг тогтоохоор холбогдох байгууллагууд ажиллаж байна. Биеийн байдал нь хүнд байгаа иргэдийг авахаар УБ хотоос 11 цагийн үед  Баянхонгор аймаг руу нисдэг тэрэг хөөрсөн. Энд эмч нар эрэмблээд хүнд байгаа иргэдийг хот руу авч явна.