Хөтөлийн цементийн үнэ тонн тутамд 240 мянгаас 184 мянга болж буурчээ

Хөтөлийн “Цемент Шохой” ТӨХК үнээ тонн тутамд 46,000 төгрөгөөр (20%) бууруулж, 184,000 төгрөг болгожээ. Энэ талаар “Хөтөл цемент шохойн үйлдвэр” ТӨХК-ийн гүйцэтгэх захирлыг түр орлогч Л.Наранбаатар:

Хөтөлийн “Цемент Шохой” ТӨХК үнээ тонн тутамд 46,000 төгрөгөөр (20%) бууруулж НӨАТ-гүй үнээр 184,000 төгрөг болгож байна. Хууль бусаар шохойн ордтой нь, дэд бүтэцтэй нь, дулааны станцтай нь, ажиллах хүчинтэй нь 4 өрөө байрны үнээр хувьчилж авсан нөхдүүд 2015 оноос хойш найдваргүй авлага, төлөх ёсгүй зээлийн хүүгийн зардалд 153 тэрбум.₮ буюу манай 800 орчим ажилчдын 15 жилийн цалинтай тэнцэх мөнгийг зардалд бүртгэж, цементийн өртөгийг нэмэгдүүлсэн байна. Өөрөөр хэлбэл олсон 100 төгрөгний орлогын 37 төгрөг нь энэ хууль бус зардалд бүртгэгдэж, өртөгт суужээ. Ингээд энэ мөнгөө гаргах арга нь үнэ нэмэх. Хуулийн байгууллагад хандах өргөдөл, гомдлууд бэлэн болсон. Хариуцлага тооцож, алдагдсан мөнгөө нэхнэ. Хулгай байхгүй болж буй тул ажилчдынхаа цалинг нэмж, улсын дундаж түвшинд аваачих боломж гарч байгаа.

Үйлдвэрээ аврах ганц арга нь та бүхэн манайхаас цемент авах явдал шүү! Манай борлуулалт одоогоор жилд 350 мян.тн байна. Энэ жил 450-500 мян.тн-д, ирэх жилээс 700 мян.тн-д буюу хүчин чадлынхаа 70%_д хүргэх зорилт тавьж ажиллана. Хулгайн зардал энэ жилээс зогсож буй тул өртөг буурах боломжтой болж байгаа юм шүү Маргааш УБ хотод Барилга Экспо-2022 болно. Цементийнхээ борлуулалтын гэрээг хямдарсан шинэ үнээр хийх тул ирээрэй бетон үйлдвэрлэгчид, байшин барилга баригчид, бүтээн байгуулагчид аа!