ТӨСВИЙН ТОДОТГОЛ: Төрийн үйлчилгээний ажилчдын цалинг нэмнэ

2022 оны төсөвт хоёр ч удаагаа гарч хүрч буй МАН-ынхан энэ онд хийгдэхээр төсөвт суулгасан  нийт 1.1 их наяд төгрөгийн хөрөнгө оруулалтын тал хувийг нь танахаар болов. Засгийн газрын ээлжит хуралдаанаар өнөөдөр /2022.04.20/ төсвийн тодотголыг хэлэлцээд улмаар УИХ-ын даргад өргөн барина. 

-Энэ онд  улсын төсвийн 518.9  тэрбум төгрөгөөр хийгдэх байсан нийт 425 төсөл, арга хэмжээний зардлыг танана. 

Нэн шаардлагатай бус контор, наадмын талбай, соёлын төв, спорт заал, цогцолбор, усан бассейн, конторын тоног төхөөрөмж, конторын их засвар, Айргийн өргөө, орон нутгийн тохижилт зэрэг 94 төслийг зогсоож, 103.8 тэрбум төгрөгийг хэмнэнэ.

-Энэ онд ашиглалтад орох боломжгүй 331 төслийг зогсоож 415.1 тэрбум төгрөгийг танана.

Дээрх 518.9 тэрбум төгрөгийг юу, юунд зарцуулах вэ гэдгийг задлан хүргэе.

НЭГ: Улсын төсвөөс 100 тэрбум төгрөг, нийслэлийн төсвөөс 100 тэрбум төгрөгийн нэмж тодотгож, нийт 200 тэрбум төгрөгөөр ирэх есдүгээр сарын 1 гэхэд цэцэрлэгийн хүүхдүүд сугалаагүй, хаяг дээрээ цэцэрлэгт хамрагддаг болгоход зарцуулна. Нийслэлийн хэмжээнд 674 цэцэрлэг байгаагаас 216 нь төрийн өмчийн, 398 нь хувийн цэцэрлэг байна. Цаашид цэцэрлэг барих, өргөтгөх, түрээсийн цэцэрлэг нэмэх гэх мэт боломжууд яригдаж буй. 

ХОЁР: Төрийн байгууллагын үйлчилгээний ажилчдын цалинг нэмэгдүүлэхэд зарцуулах. 2022 оны нэгдүгээр сарын 1-нээс эхлэн төрийн үйлчилгээний ажилтан болох цэцэрлэгийн үйлчлэгч, манаач, тогоочийг гэрээт ажилтан болгосон. Үүнийг буцааж төсвийг нь босоо болгохоор төсөвт суулгах юм байна. Төрийн үйлчилгээний ажилчид 470-570 мянган төгрөгийн үндсэн цалин авч ажилладаг бөгөөд 50-аас дээш насныхан ихэнх хувийг нь эзэлдэг.

ГУРАВ: Нийгмийн даатгалын шимтгэлийн 50 хувийг сар бүр буцаан олгоход зарцуулах. Тодруулбал, төрийн байгууллага, газрын тос, уул уурхайн чиглэлээр үйл ажиллагаа эрхэлдэг ААН-үүдээс бусад ААН-үүдийн ажилтны төлдөг НДШ-ийн 50 хувийг сар бүр буцаан олгохоор Засгийн газраас шийдвэрлэсэн. Үүнд нийтдээ 260 гаруй тэрбум төгрөг шаардлагатай. 

ДӨРӨВ: Хөдөө аж ахуйн гаралтай ялангуяа хүнсний бүтээгдэхүүний нөөцийг хангах зорилгоор ААН-үүдэд дэмжлэг үзүүлэх зэрэгт төсвийн тодотголоос гаргах 518.9  тэрбум төгрөгийг зарцуулахаар төлөвлөжээ.