"Айргийн өргөө" барих төсвийг танасанд УИХ-ын гишүүн Ц.Анандбазар ихэд уурсжээ

2020 оны УИХ-ын сонгуулиар бүрдсэн Г.Занданшатарын парламентын гишүүд дундаас хамгийн их хэл аманд өртөж, УИХ-ын гишүүнээс эгүүлэн татагдаж болзошгүй нөхцөл хангасан гишүүн бол Ц.Анандбазар.  Тодруулбал, Нийслэлийн прокурорын газар өнгөрсөн оны аравдугаар сард ирүүлсэн тус хүсэлттэй танилцаад “Ц.Анандбазарыг яллагдагчаар татах тогтоол үйлдэж” цагдаагийн байгууллагад хүргүүлсэн талаар  хэдэн сарын өмнөөс хэвлэлүүд мэдээлж байв.

Улмаар цагдаагийн байгууллага энэхүү хүсэлтэд үндэслэн УИХ-ын гишүүний бүрэн эрхийг нь бүр эсвэл түр түдгэлзүүлэх саналаа УИХ-ын Ёсзүйн дэд хороо болон холбогдох байнгын хороонд илгээх бөгөөд гишүүнээс түр түдгэлзүүлсэн тохиолдолд хэргийг шалгаж, гэм буруутай нь тогтоогдвол УИХ-ын гишүүнээс нь бүрмөсөн эгүүлэн татаж ял оноох нөхцөл бүрдэх юм.

Булганчуудыг төрд төлөөлөх ёстой эрхэм түшээ парламентын үндсэн ажлаа хийхгүй хөдөөгүүр малчдын хотоор бэлэг сэлт тараагаад явж байгаа зураг нь байсхийгээд л цахим орчноор тархдаг.

 УИХ-ын гишүүн гэх гуншингаас цаашгүй түүнд санаачилсан хууль нэг ч үгүй. Энэ оны төсвийг хэлэлцэх үеэр  УИХ-ын гишүүн Ц.Анандбазар сиймхий ашиглан  Булган аймгийн Хутаг-Өндөр суманд улсын төсвийн 3.8 тэрбум төгрөгийн хөрөнгөөр Айргийн өргөө барих саналыг оруулж төсвийг нь суулгуулсан. Мөн Богд Зонховагийн хөшөөг 32 тэрбумаар барих  саналыг гаргасан гурван гишүүний нэг нь тэр. 

 Голдуу төсөв, мөнгөтэй холбоотой асуудал хэлэлцэх үеэр саарал ордонд харагдах тэрбээр өчигдөр МАН-ын бүлгийн хуралдаанаар төсвийн тодотголыг хэлэлцэхэд оролцов. Шалтгаан нь  Булган аймагт улсын төсвийн 3.8 тэрбумаар баригдах "Айргийн өргөө"-ний төсвийг танахаар оруулж ирснийг сонсоод ихэд ундууцан бүлгийн хуралдаанд суух нь тэр.  "Айргийн өргөө" баригдснаар  найман сумын иргэдийн амьжиргааг дээшлүүлнэ  гэж тас гүрийсэн ч тусыг эс олжээ. 

Булган аймагт очих бүрт ярианы ганц сэдэв нь болж байсан Айргийн өргөөнийхөө төсвийг хасуулчихсан тэрбээр гундуухан бүлгийн хуралдаанаас гарч одсон юм.