Б.Пүрэвдорж: Тэтгэврийн хэмжээг 5 жилийн шимтгэлээс тооцдог болох хуулийг хэлэлцэхгүй бол ахмадуудтайгаа жагсана

УИХ-ын чуулганы нэгдсэн хуралдааны эхэнд Олон улсын хямралт нөхцөл байдлаас үүдэлтэй гол нэр төрлийн бараа бүтээгдэхүүний үнийн өсөлт, хомсдолоос сэргийлэх, сөрөг нөлөөллийг бууруулах тухай хуулийн төсөл болон хамт өргөн мэдүүлсэн бусад хуулийн төслүүдийг эцэслэн батлав. 

Энэ үеэр УИХ-ын гишүүн Б.Пүрэвдорж үг хэлэв. Тэрбээр "Тэтгэвэр тогтоохдоо долоон жилийн цалингийн дунджаар биш таван жилийн цалингийн дунджаар тогтоох тухай хуулийн төслийг хэлэлцүүлэхийг шаардсан. УИХ-ын дарга чиглэл өгөхдөө байнгын хороон дээрээ үүнийг хэлэлц гэсэн.  Гэтэл тухайн долоо хоногт байнгын хороо хуралдаагүй, өнгөрсөн долоо хоногт хуралдсан боловч байнгын хорооны дарга нь манай намын бүлгээс  өргөн барьсан Нийгмийн даатгалын багц хуулийг Засгийн газарт нь буцаасан гэж тайлбар өгсөн. 

Би МАН-ын гишүүн биш. Би танай намын бүлгээрээ юу хэлэлцсэнийг би дагах шаардлагагүй.  УИХ-ын гишүүн хууль өргөн барьсан бол тэр хуулийг нь хэлэлцүүлэх ёстой. Үүнд МАН-ын бүлэг ямар ч хамаарал байхгүй. Тиймээс Даргын зөвлөлийн хуралдаанаар хэлэлцэх ирэх долоо хоногийн чуулганы хуралдаанаар энэ хуулийн төслийг  хэлэлцүүлж өгөөч гэж хүсэж байна.

Хэрэв ирэх долоо хоногийн хэлэлцэх асуултын жагсаалтад оруулахгүй бол НББХ-ны дарга М.Оюунчимэгийн сонгогдсон тойрог болох Чингэлтэй дүүргийн Ялалтын талбай дээр ирэх долоо хоногийн Лхагва гаригт ахмадуудтайгаа 30 минут жагсах болно. Үүний дараа болохгүй бол УИХ-ын даргын сонгогдсон Баянхонгор аймагт жагсаал зохион байгуулна. Хэрэв арга хэмжээ авахгүй бол Ерөнхий сайд, МАН-ын дарга Хэнтий нутагт жагсана. Цаашлаад шийдэхгүй бол бүх аймагт жагсах болно" гэв.