Хүүхдээ хаяж явсан эцэг эхэд Цагдаагийн байгууллагаас эрүүгийн хэрэг үүсгэх саналтай прокурорт шилжүүлжээ

Налайх дүүрэгт дөрвөн сартай хүүхдийг гадаа гудамжинд хаяж, аав ээж нь хоорондоо хэрэлдээд 30 гаруй минут орхиж явлаа гэх бичлэг Өчигдөр /2022.04.13/ цахим сүлжээнд тавигдсан. 

Тухайн үед хүүхдийн эцэг, эх нь хоёулаа согтуу байсан гэх мэдээллийг холбогдох байгууллагаас мэдээлсэн. Харин дөрвөн сартай хүүхдийг түр хамгаалах байранд авсан билээ. 

Эцэг, эх нь 28-38 насны хүмүүс бөгөөд тэднийг өглөө эрүүлжүүлэх байрнаас гаргаж хүүхдийн эрх зөрчигдсөн эсэх асуудлаар цагдаагийн байгууллагаас шалгаж эхэлсэн. Эцэг, эхийнх нь хувьд тухайн үед хүүхдээ яагаад газар тавьснаа санахгүй байна гэж мэдүүлсэн гэх мэдээлэл байгаа юм. Тэгвэл хэргийг Налайх дүүрэг дэх Цагдаагийн хэлтэст шалгаж, хүүхдээ хаяж явсан гэх эцэг, эхэд эрүүгийн хэрэг үүсгэх саналыг цагдаагийн байгууллага гаргаж прокурорт шилжүүлсэн байна.