Дөрвөн сартай хүүгээ гадаа хаясан ээж Д нь сэтгэцийн өвчтэй, бичиг үсэггүй учир өмгөөлөгчтэй мэдүүлэг өгнө

“Налайхчуудын нээлттэй групп” цахим хуудсанд 2022 оны 04 дугаар сарын 13-ны өдрийн 16:30 цагийн үед нэгэн иргэн хүүхдийг эцэг эх нь гудамжинд үлдээсэн талаарх мэдээллийг нийтэлсний дагуу дүүргийн Цагдаагийн хэлтэст хэргийг шалгаж буй. 

Хүүг Гэр бүл, хүүхэд, залуучуудын хөгжлийн хэлтэст мэдэгдэж, дүүргийн Нэгдсэн эмнэлгийн яаралтай тусламжийн тасгийн үзлэгт хамруулж, одоогийн байдлаар ГБХЗХГ-ын дэргэдэх Түр хамгаалах байранд байлгаж байна. 

Эцэг Д.Б нь Сүхбаатар аймгийн харьяат бөгөөд бүрэн дунд боловсролтой, мэргэжилгүй, эрхэлсэн тодорхой ажилгүй бол эхнэр Л.Д-тэй хамтран амьдраад гурван жил болж байгаа аж. Тэрбээр  2016 онд Эрүүгийн хуулийн 145.2-т заасан гэмт хэрэг үйлдэж, нэг жилийн хорих ял авч, нэг жилийн хугацаатай тэнсэн харгалзах ялаар шийтгүүлж, Захиргааны хяналтад байсан, 2015, 2019, онд тус бүр 1, 2021 оны 7, 9, 12 дугаар сард эрүүлжүүлэгдэж байжээ. 

Харин хүүгийн ээж Л.Д нь Налайх дүүрэгт оршин суух хаягтай, боловсрол, мэргэжилгүй, 2014-2020 онуудад нийт долоо удаа эрүүлжүүлэгдэж, 2014-2015 онуудад Захиргааны хариуцлагын тухай хуулиар гурван удаа торгуулж байжээ.Тэрбээр сэтгэцийн эрүүл мэндийн өвчлөлөөр группт байдаг бөгөөд. мэдүүлэгтээ нөхөр Д.Б-тэй хамтран амьдрахаас өмнө гурван удаа хүүхэд төрүүлж байсан хэдий ч 1-2 насандаа нас барсан гэж мэдүүлжээ. 

Тэд Сүхбаатар аймгийн Мөнххаан суманд очиж  хамаатны айлд мал маллах ажилд нь тусалж байгаад, хүү Б.А-г өрхийн эмчийн хяналтад үзүүлэх зорилгоор Хэнтий аймгаас 20 хоногийн өмнө ирээд байжээ. Хотод ирсэн хугацаандаа  дөрвөн удаа архи согтууруулах ундаа хэрэглэсэн гэж тэд ярьсан байна. 

Эх Д нь бичиг үсэг мэдэхгүй учраас улсын өмгөөлөгчийг ирэхийг хүлээн нөхрийн хамт яг одоо цагдаагийн хэлтэс дээр байгаа аж.