Дөрвөн сартай хүүхдээ гудамжинд хаяж, архидан согтуурсан гэх эцэг, эхийг шалгаж байна

Налайх дүүрэгт дөрвөн сартай хүүхдийг гадаа гудамжинд тавьж, аав ээж нь хоорондоо хэрэлдээд 30 гаруй минут орхиж явлаа гэх бичлэг Өчигдөр /2022.04.13/ цахим сүлжээнд тавигдсан. 

Уг мэдээллийн хүрээнд  Гэр бүл, хүүхэд, залуучуудын хөгжлийн газрын мэргэжилтнүүд ажиллаж эцэг эх нь согтуу байсан тул Эрүүлжүүлэх байр руу явуулсан байна. Харин дөрвөн сартай хүүхдийг түр хамгаалах байранд авчээ. Хүүхдийг эрүүл мэндийн үзлэгт хамруулсан бөгөөд биеийн байдал нь хэвийн байгаа талаар  тус газраас мэдээллээ. 

Мөн энэ талаар ЦЕГ-аас тодруулахад "Бид энэ асуудлыг хармагцаа харъяа цагдаагийн байгууллагаас тодруулах хүсэлт явуулсан. Одоогоор дэлгэрэнгүй мэдээлэл бидэнд ирээгүй байна. Эцэг эх нь гэр бүлийн хүчирхийлэл үйлдсэн эсэх, хүүхдийн эрх зөрчигдсөн эсэхийг Налайх дүүрэг дэх Цагдаагийн хэлтэст шалгаж байна" гэлээ.