Ж.Сүхбаатар: УИХ-ын гишүүн хууль санаачлахад 20 сая төгрөг авдаггүй, бензиний төлбөрт сард 500 мянган төгрөг л авдаг

Эдийн засгийн хүндрэл, нийгмийн шаардлагаар төрийн  байгууллагуудад хэмнэлтийн горимыг мөрдүүлж, зардлыг 10-аас доошгүй хувиар хэмнэх, бүтэц, чиг үүргийг хянаж, давхардлыг арилгах, удирдлагын орон тоо, зардлыг бууруулах. Мөн тансаг хэрэглээний болон бүх төрлийн архи, тамхины онцгой албан татварыг нэмэгдүүлэх асуудлыг судалж, хэрэгжүүлэхээр болсон. 

Тэгвэл УИХ-ын гишүүд хэмнэлтийн бодлогыг хэрэгжүүлэх хүрээнд юу, юунаас татгалзах вэ гэдгийг МАН-ын бүлгийн хуралдаанаар сэтгүүлчдэд тодрууллаа. 

Уг асуултад УИХ-ын гишүүн Ж.Сүхбаатар "Гишүүд дөрвөн тэрбумыг төсөвтэй авдаг гэж хүмүүс буруу ойлгодог. Хэзээ ч тийм зүйл байгаагүй, өмнө нь ч байгаагүй.  Тэр бол аймаг, дүүрэгт хийх хөрөнгө оруулж буй эрхтэй холбоотой асуудал. Хоёрдахь буруу ойлголт нь гишүүд хууль санаачлахдаа 20 сая төгрөг авдаг гэдэг нь мөн л ташаа мэдээлэл. Өмнө нь ч, одоо ч байхгүй. УИХ-ын гишүүдийн жилийн зардал дотор  20 сая төгрөгт хууль санаачлах, мэдээлэл сурталчилгааны зардал гэж олон жил буюу монголын төр анх байгуулагдсан цагаасаа хойш хууль боловсруулах зардал байна гэж хэлчихээд  өнөөдрийг хүртэл 0 төгрөг явж ирсэн. Гадаадын зээл тусламж, төслөөр санхүүжүүлж явсныг нь сүүлийн 10 гаруй жилүүдэд хэдэн төгрөг тавьж байгааг хэлээд байгаа юм. 

 Гуравдугаарт, гишүүд утасны төлбөрөө төлүүлдэггүй. Шатахууны төлбөр гэдэгт  сарын хугацаанд 500 мянган төгрөг байдаг. Гишүүд нэг зөвлөхтэй, нэг туслахтай, орон нутагтаа ажиллах хоёр бие төлөөлөгчтэй байдаг. Ер нь УИХ-ын нийт зардал 50 тэрбум төгрөг байдаг. Хоёр сарын өмнө гишүүдийн зардлаас 11 хувийг, байнгын хороодын зардлыг 16 хувийг хэмнэсэн. Орон тооны цомхотгол хийх нь энэ цаг үед тохиромжгүй" гэлээ.