Л.Оюун-Эрдэнэ: Шатахууны үнийн өсөлтийн зөрүүг Засгийн газраас төлнө

Ерөнхий сайд өнөөдөр /2022.04.08/  төв талбайд жагсагчидтай уулзаж, шаардлагуудыг нь Засгийн газрын ээлжит бус хуралдаанаар хэлэлцэхээ мэдэгдлээ. Залуучууд 15 шаардлага тавьсны нэг нь үнийн өсөлтийг бууруулах тухай хөндсөн. 

Үүнд Ерөнхий сайд дараах хариултыг өглөө. Тэрбээр "Өнөөдөр Монгол Улсад төдийгүй дэлхий даяар үнэ өссөн нь үнэн. Засгийн газар УИХ руу үнэ барих хууль оруулж ирсэн. УИХ-ын гишүүд энэ хуулийг батална гэдэгт итгэлтэй байна. Энэ хууль батлагдсанаар 1000 төгрөгөөр өсөх байсан шатахууны үнийг  тогтвортой барих, зөрүүг нь Засгийн газраас  төлөхөөр тооцож байгаа.Зах зээлийн үед шатахууны үнийг барина гэдэг амаргүй. Миний оронд ч хэн ч байсан, бурхан ч байсан шийдэх боломжгүй. Бид шатахууныг өөрсдөө үйлдвэрлэдэггүй. Бид зах зээлийн нийгмийг сонгож авсан. Бид өмнөх нийгэм рүүгээ буцаж орж болохгүй. Гэхдээ Засгийн газар мах, гурил, эм эмнэлгийн хэрэгслийг таслахгүй байхын төлөө чадах бүх зүйлээ хийнэ гэж амлаж байна. Гэхдээ энэ бүхэн амаргүй байх нь тодорхой.  Засгийн газар ид шидтэн биш гэдгийг ойлгох хэрэгтэй" гэлээ.