Х.Нямбаатар: Жагсаалын үеэр баривчлагдсан залуусыг өнөөдөр өглөө сулласан

Ерөнхий сайд Л.Оюун-Эрдэнэ "Өчигдөр гарч ирэхийг их хүссэн. Өнөөдөр миний хувьд амаргүй олон дүрэм журмыг давж, гарч ирлээ.  Аль ч улс оронд жагсаал бүхний өмнө Ерөнхий сайд нь шууд гарч ирэх тохиолдол олон биш. 

Харин бид одоо шийдэл ярих ёстой. Бид хамт хичээж байж өнгөрсөн 30 жилд үүссэн алдаа, завхралыг засаж чадна гэдгийг хэлэх нь зүйтэй.

Өчигдөр би ХЗДХ-ийн сайд болон хууль хяналтын байгууллагад огт хүч хэрэглэж болохгүй гэж байнга хэлж байсан. Гэхдээ зарим хүнээс тодорхой хэмжээний тодруулга авах шаардлагатай байсан бөгөөд өнөөдөр ямар хүн хорионд байхгүй байгаа гэдгийг ХЗДХ-ийн сайд надад хариуцлагатайгаар мэдэгдсэн. Хэрвээ энэ асуудалд өөр ямар нэг зүйл байгаа бол миний хувьд хариуцлага тооцоход бэлэн байна” гэв.

Хууль зүй, дотоод хэргийн сайд Х.Нямбаатар хэлэхдээ жагсаалын үеэр баривчлагдсан залуусыг өнөөдөр өглөө суллаж байгаа гэв. Мөн жагсагчдыг баривчлахдаа хүний эрх зөрчсөн байж болзошгүй цагдаа нарыг шалгаж байна.