Хаалттай хэлэлцэж буй Тагнуулын байгууллагын хуулийн өөрчлөлтөөр Цэргийн тагнуулын байгууллагыг байгуулна

Тагнуулын байгууллагын тухай хуульд нэмэлт, өөрчлөлт оруулах хуулийн төслийг энэ оны гуравдугаар сарын 4-ны өдөр УИХ-ын даргад өргөн мэдүүлсэн. Хуулийн төслийг хэлэлцэхийг УИХ, байнгын хороогоор дэмжсэн бөгөөд энэ долоо хоногийн УИХ-ын чуулганы нэгдсэн хуралдаанаар анхны хэлэлцүүлгийг хаалттай хэлэлцэнэ. 

Хуульд орж буй гол өөрчлөлт нь Цэргийн тагнуулын байгууллагыг байгуулахаар тусгажээ. Тодруулбал, Цэргийн тагнуулын байгууллага нь Монгол Улсын Зэвсэгт хүчний удирдлагыг Үндэсний аюулгүй байдал, үндэсний язгуур ашиг сонирхолд нийцсэн цэрэг-улс төрийн болон цэрэг-стратегийн тагнуулын мэдээллээр хангах үндсэн чиг үүрэг бүхий чиг үүрэгтэй ажиллах аж. 

.Цэргийн тагнуулын байгууллагыг Зэвсэгт хүчний Ерөнхий командлагчтай зөвшилцсөний үндсэн дээр Засгийн газар байгуулж, өөрчилж, татан буулгана гэж хуулийн төсөлд тусгажээ. 

Мөн  Цэргийн тагнуулын байгууллагын дүрэм, ажиллах журмыг Зэвсэгт хүчний Жанжин штабын дарга болон Тагнуулын ерөнхий газрын даргын хамтарсан тушаалаар батална. Цэргийн тагнуулын байгууллага бэлгэ тэмдэгтэй байна. Бэлгэ тэмдгийн загвар, хэрэглэх журмыг Зэвсэгт хүчний Жанжин штабын дарга батална гэж хуулийн төсөлд тусгагдсан байна.