С.Эрдэнэ: Х.Баттулга манай намын гишүүн биш, жил гаруй талцсан маргаан нэг талдаа гарлаа

Улсын дээд шүүхийн өнөөдрийн /2022.03.31/ хуралдаанаар С.Эрдэнэ даргатай АН-ын Үндсэн дүрмийн өөрчлөлтийг бүртгэжээ. Ингэснээр С.Эрдэнэ даргатай АН-ыг хууль ёсны хэмээн Улсын дээд шүүх үзсэн байна. Энэ талаар АН-ынхан өнөөдөр мэдээлэл хийлээ. 

Энэ үеэр АН-ын дарга С.Эрдэнэ:

-АН-ын хувьд түүхэн шийдвэр гарсан өдөр байлаа. Жил зургаан сар үргэлжилсэн үл ойлголцол, маргаан эцэслэгдэн дууслаа. Одоо АН-д үндсэн дүрмийн зөрчил үгүй боллоо. Өмнө нь зарлагдаж байсан АН-ын даргын сунгаа, бусад холбогдох асуудал бүгд хууль бус байсныг Дээд шүүх баталгаажууллаа.  Бид Үндсэн дүрмийнхээ дагуу намын шинэчлэл өөрчлөлтийн ажлуудыг эхлүүлнэ. Мөн намын бүх шатны эргэлтийн сонгуулийг яаралтай зохион байгуулна.  Үндсэн дүрмийн дагуу зарим дүрэм журмын өөрчлөлтийг хийнэ. Дотоод ажлуудаа хийсний дараа дараагийн намын хүчирхэг шинэ удирдагчийг гаргана. Үл ойлголцох байдалд орж байсан нийт журмын нөхөд гишүүдээ хандаж хэлэхэд АН атгасан гар мэт нэгдэлтэй байж бүх шатны сонгуульд амжилт гаргах суурийг тавьж байна. АН-ын бүх шатны байгууллагын үүд хаалга гишүүдийн маань өмнө нээлттэй байгаа шүү, хамтдаа урагшаа" гэв.