Цаг агаар: Баруун аймгийн нутгаар хүчтэй шороон шуургатай байхыг онцгойлон анхааруулж байна

Малчид, иргэд, тээвэрчдийн анхааралд:

Маргааш өдөр баруун аймгуудын нутгийн баруун хэсгээр салхи секундэд түр зуур 18-20 метр хүрч ширүүсэж, шороон шуурга шуурахыг онцгойлон анхааруулж байна.

2022 оны 03 сарын 29-ний 20 цагаас 03 сарын 30-ны 20 цаг 

хүртэлх цаг агаарын урьдчилсан мэдээ:

Хур тунадас: Ихэнх нутгаар солигдмол үүлтэй. Шөнөдөө говийн аймгуудын нутгийн өмнөд болон зүүн хэсэг, зүүн аймгуудын нутгийн өмнөд хэсгээр, өдөртөө баруун аймгуудын нутгийн баруун хэсгээр хур тунадас орно.

2022 оны 03 дугаар сарын 28-наас 04 дүгээр сарын 04-нийг хүртэлх

7 хоногийн цаг агаарын урьдчилсан төлөв:

/Ихэнх хугацаанд өдөртөө дулаарах төлөвтэй байна./

Хур тунадас: 28-нд баруун, төв, зүүн аймгуудын нутгийн зарим газраар, 29-нд зарим газраар, 30-нд баруун аймгуудын нутгийн баруун хэсэг, говийн аймгуудын нутгийн зүүн хэсгээр хур тунадас, 31-нд баруун аймгуудын нутгийн ихэнх, төв болон говийн аймгуудын нутгийн зарим газраар, 4 дүгээр сарын 01-нд говийн аймгуудын нутгийн зүүн хэсгээр бороо, нойтон цас орно. Бусад хугацаанд хур тунадас орохгүй.

Салхи: 28-нд говь, тал, хээрийн нутгаар секундэд 12-14 метр, 30-нд Алтайн салбар уулс болон Арц Богдын өвөр хоолойгоор секундэд түр зуур 16-18 метр хүрч шороон шуурга шуурна.

Агаарын температур: Шөнөдөө Увс нуур болон Дархадын хотгор, Завхан, Идэр, Тэс голын хөндийгөөр 17-22 градус, Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Туул, Тэрэлж, Хэрлэн, Онон, Улз, Халх голын хөндийгөөр 13-18 градус хүйтэн, говийн бүс нутгийн өмнөд хэсгээр 1 градус хүйтнээс 4 градус дулаан, бусад нутгаар 8-13 градус хүйтэн, өдөртөө Увс нуур болон Дархадын хотгор, Завхан, Идэр, Тэс голын хөндийгөөр 4-9 градус хүйтэн, Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Туул, Тэрэлж, Хэрлэн, Онон, Улз, Халх голын хөндийгөөр өдөртөө 2 градус хүйтнээс 3 градус дулаан, Орхон Сэлэнгийн сав газар болон говийн бүс нутгийн өмнөд хэсгээр 10-15 градус, бусад нутгаар 3-8 градус дулаан байна.