Н.Алтанхуяг: Хөгжлийн банкны асуудлаар хоосон улстөржиж ял завшуулах биш Түр хороо байгуулах ёстой

Хөгжлийн банкны чанаргүй зээлийн асуудлын талаар маргааш /2022.03.28/ УИХ-ын Эдийн засгийн байнгын хорооноос Ерөнхий хяналтын сонсголыг зохион байгуулна. Тодруулбал, Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилтэд хяналт тавьж, шалгалт хийсэн талаарх холбогдох эрх бүхий байгууллагуудын тайлан, мэдээлэлтэй танилцах, холбогдох хууль тогтоомжийн хэрэгжилтэд хяналт тавих чиглэлээр олон талын оролцоог хангасан хэлэлцүүлэг болох юм. 

Уг хяналтын сонсголд УИХ-ын гишүүд идэвхтэй оролцох нь чухал бөгөөд тэдний хэн нь авлига, хээл хахуулийн эсрэг дуугарах нь  уу гэдэг олон нийт анхаарал тавьж буй. 

Тэгвэл УИХ-ын гишүүн Н.Алтанхуяг уг хяналтын сонсголд оролцохоо илэрхийлжээ. Тэрбээр энэ тухай  "Хоосон улстөржиж хулгайч дээрэмчдийг ял завшуулах биш холбогдох бүх хүмүүс нь оролцоод баримт нотолгоотой, үнэн зөвийг ярьсан сонсгол болоосой. Нэг сонсголоор асуудлыг шийдэхгүй учир УИХ-ын Түр хороо байгуулаад тууштай ажиллаж, сайн нягталсан нь дээр" гэсэн байр суурийг илэрхийлсэн.

УИХ-аас Хөгжлийн банкыг шалгах ажлын хэсгийг байгуулсан. Гэвч гишүүдийн зүгээс Хяналт шалгалтын түр хороог байгуулах саналыг гаргаж, гарын үсэг цуглуулж эхэлсэн. Одоогоор 15 гишүүн Түр хороо байгуулахыг дэмжээд байгаа юм. Хуулиараа 19 гишүүн дэмжиж байж Түр хороо байгуулагдах учиртай. 

Сануулахад, Хөгжлийн банкны нийт чанаргүй зээл 1.8 их наяд төгрөг байгаагаас өнөөдрийн байдлаар 107 тэрбум төгрөгийн эргэн төлөлт хийгдсэн.