ХӨГЖЛИЙН БАНК: Цагдаагийн хурандаа Д.Мөнхбаатар 700 сая төгрөгийн зээл аваад мурьжээ

Хөгжлийн банкнаас гарсан зээл болгоны цаана эрх мэдэл, албан тушаал бүхий хүмүүс байгаа нь явах тусам ил болсоор байна. Үүний нэг "Эрд хул" ХХК бөгөөд эзэмшигч болох Цагдаагийн хурандаа Д.Мөнхбаатар нь Монгол Улсын Ерөнхий аудитор асан Д.Хүрэлбаатарын төрсөн дүү юм. Ерөнхий аудитор асан Д.Хүрэлбаатар нь 2018 онд ЖДҮХС-гаас 950 сая төгрөгийн зээлийг өөрийн эзэмшил бүхий компаниар дамжуулан авсан нь ил болж, үүний дараа ажлаа хүлээлгэн өгсөн байдаг. Тэгвэл энэ удаа түүний төрсөн дүү Хөгжлийн банкны зээлийг тойрсонгүй 700 сая төгрөгийн зээл авч амжжээ.

Д.Хүрэлбаатарын төрсөн дүү Д.Мөнхбаатар нь уул уурхайн чиглэл бүхий Эрд хул ХХК-иараа дамжуулан гурил үйлдвэрлэх нэрийдлээр 2017 онд Хөгжлийн банкнаас 700 сая төгрөгийн зээл авсан бөгөөд 598 сая төгрөгийн зээлийн зөрчилтэй, зээлийг зориулалтын бусаар зарцуулсан нь холбогдох байгууллагын шалгалтын дүнд ил болоод байгаа юм. Мөн зээл авахдаа ирээдүйд бий болох хөрөнгө барьцаалсан нь анхаарал татна.

Дашрамд дурдахад Д.Мөнхбаатар нь Цагдаагийн ерөнхий газрын Тусгай ажиллагааны газарт Бүлгийн даргаар 2019 оныг дуустал ажиллаад, ажлаасаа чөлөөлөгдсөн юм байна.