АН-ын даргад нэр дэвшигч Х.Баттулгыг гэмт хэргүүдэд холбон бичсэн сонин тарааж эхэлжээ

Ардчилсан намын даргын сонгуульд нэр дэвшигчдийн орон нутаг дахь уулзалтууд үргэлжилсээр байна. Энэ удаад АН-ын даргын сонгуульд  Ерөнхийлөгч асан Х.Баттулга, УИХ-ын гишүүн Ж.Батсуурь нар нэр дэвшиж буй. Нэр дэвшигчид өнөөдөр /2022.03.27/ Сэлэнгэ аймагт ажиллаж, мөрийн хөтөлбөрөө танилцуулж явна. Тэгвэл  нэр дэвшигч зөвхөн Х.Баттулгын тухай сөрөг бүхий  сонингийн материалыг өчигдрөөс эхлэн аймгуудад тарааж эхэлжээ. Ингэхдээ уг сонинг ил тод тараагаагүй бөгөөд айлуудын хашаа, хаалганд наах байдлаар тарааж байгаа аж. 

Нэр дэвшигч Х.Баттулгын зүгээс уг асуудлаар мэдэгдэл хийгээгүй байгаа бөгөөд тэрбээр АН-ын даргын сонгуульд өрсөлдөж буй шалтгаанаа ийн тодотгосон. Тодруулбал,  "АН-аас гишүүн, сайд, Ерөнхийлөгч болж байсны хувьд намынхаа энэ үед өөрийнхөө хүчийг нэмэрлэе гэж үзээд  намын даргад өрсөлдөх шийдвэрээ гаргасан. Хэрэв би намын дарга болвол тамганыхаа асуудлыг нэн түрүүнд цэгцэлж, нэг тугийн дор байлгана. Ардчилсан үзэл бодолтой хувь хүн, хувьсгалчид, бусад намыг эгнээндээ нэгтгэн ирэх 2024 оны УИХ-ын сонгуульд ялалт байгуулна гэсэн гурван зүйлийг баримталж байна" гэдгээ тэрбээр уулзалт бүр дээрээ намын гишүүддээ хэлж байгаа билээ. 

Уулзалтад ирсэн гишүүдийнх нь зүгээс  АН-ын нэг болгож, тамга тэмдгээ нэг талдаа цэгцэлж АН-ыг хүчтэй болгоорой гэдгийг хэлж байгаагаас гадна нэр дэвшигчдийг сурталчилгааныхаа хугацаанд шударга, ил тод өрсөлдөхийг захиж буй. 

Өнгөрөгч орон нутгийн сонгуульд 21 аймгаас 11-д нь АН ялалт байгуулж найман  аймагт дангаараа засаглаж байгаа. Мөн 330 сумын 193-т нь ялж 139-д нь дангаараа засаглаж байна.АН намын даргаа ирэх дөрөвдүгээр сарын 3- нд сонгож, улмаар дөрөвдүгээр сарын 7-ны өдөр намын Их хурлаараа батламжлах юм.