Дарханы төмөрлөгийн үйлдвэрийн бичиг, баримтыг АТГ-т бүхээгтэй портер машинаар авч ирлээ

Төмрийн хүдрийн олборлолт, боловсруулалт, экспорт, гангийн үйлдвэрлэл гэсэн чиглэлээр үндсэн үйл ажиллагаагаа явуулдаг Дарханы төмөрлөгийн үйлдвэрийн баримт, бичгүүдийг  өнөөдөр АТГ-т бүхээгтэй портер автомашинаар авчирсан байна. 

Худалдаа хөгжлийн банкны эзэн Д.Эрдэнэбилэгийн хамаарал бүхий “Кью Эс Си” ХХК  Дарханы төмөрлөгийн үйлдвэр, Төмөртэйн ордыг өөрсдөдөө менежментийн хувьчлалаар авсан байдаг. 

“Кью Эс Си” ХХК нь “Уул уурхай, металлургийн цогцолбор байгуулах” төслийн хүрээнд Хандгайт өртөөнөөс Төмөртэйн уурхай хүртэл 33.4 км төмөр зам болон ачиж, буулгах терминал барих ажлыг санхүүжүүлэх зориулалтаар 2014 онд Монгол Улсын Хөгжлийн банктай зээлийн гэрээ байгуулж, 2015 оны 12 дугаар сард гэрээний нэмэлт, өөрчлөлтөөр 71.3 сая ам.долларын зээл авсан байна.

Улмаар нэгдүгээр сарын 14-нд Улсын Дээд шүүх тус компанийг үүргээ биелүүлээгүй хэмээн үзэж, 200 гаруй тэрбум төгрөгийг Хөгжлийн Банканд төлүүлэх шийдвэр гаргаад буй.

Монгол улсын анхны бөгөөд хамгийн том ган үйлдвэрлэгч компанид ийнхүү шалгалт орж байна. 

Уг үйлдвэр анх 1990 оны 04 сарын 14 өдрийн Сайд нарын Зөвлөлийн 160 дугаар тогтоолоор Монгол болон Япон улсын засгийн газрын тогтоолоор Дархан-Сэлэнгийн бүс нутаг дахь Баянгол,Төмөртэй, Төмөртолгой гэх 3 төмрийн хүдрийн орд газруудыг түшиглэн байгуулагдаж байсан юм.