БГД-ийн Засаг дарга Ө.Сумъяабаатарыг огцруулжээ

Л.Бямбажав

2022/03/25

Баянгол дүүргийн ИТХ-ын өнөөдрийн /2022.03.25/ хуралдаанаар тус дүүргийн Засаг дарга Ө.Сумъяабаатарыг огцруулах асуудлыг хэлэлцэв. Хуралдаанд ИТХ-ын 40 төлөөлөгч 100 хувийн ирцтэйгээр оролцжээ. Ингээд нийт 29 төлөөлөгч буюу 72.5 хувь нь Засаг дарга Ө.Сумъяабаатарыг огцруулахыг дэмжсэн байна. Харин 11 төлөөлөгч буюу 27,5 хувь нь дэмжээгүй байна.

Огцруулах саналаа өгсөн төлөөлөгчдийн 18 нь АН, МАН 10, ХҮН-ын нэг төлөөлөгч байв.

Ө.Сумъяабаатарыг огцруулах саналыг тус дүүргийн ИТХ-ын Ардчилсан намын бүлгээс гаргасныг ийн шийдвэрлэв.

Ө.Сумъяабаатарын хувьд улс төр судлаач, нийгмийн ухааны багш мэргэжилтэй. 2001 онд Шинжлэх ухааны академийн Философи социологи эрхийн хүрээлэнгийн улс төр судлалын секторт эрдэм шинжилгээний ажилтан болж, хөдөлмөрийн гараагаа эхлүүлсэн.

2005-2008 онд МАН-ын Ерөнхий нарийн бичгийн даргын туслах, Ерөнхий сайдын шадар туслах, Засгийн газрын хэрэг эрхлэх газрын шинжээч,
2014-2016 онд Байгаль орчин, ногоон хөгжил аялал жуулчлалын яамны Төрийн захиргаа удирдлагын газрын дарга, “Цэнгэг усны нөөц, байгаль хамгаалах төв” улсын үйлдвэрийн газрын захирал,
2016-2019 онд “Эрдэнэс-Тавантолгой” ХК-ийн Захиргаа удирдлагын газрын захирал
2020 оны долдугаар сараас Боловсрол, шинжлэх ухааны сайдын зөвлөхөөр тус тус ажиллаж байсан.

Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна

Шинэ мэдээ