"Ч.Улаан гэдэг хүн малыг амьдаар нь гаргана гэж яриад улс төрийн карьер нь дуусч байсан шүү, З.Мэндсайхан сайд аа"

УИХ-ын чуулганы үдээс хойших хуралдаанаар УИХ-ын гишүүн Ц.Даваасүрэнгээс Монгол Улсын Хүнс, хөдөө аж ахуй, хөнгөн үйлдвэрийн сайд З.Мэндсайханд хандан “Малын гаралтай түүхий эдийг боловсруулах үйлдвэрлэлийн цогцолбор байгуулах, мал аж ахуйн гаралтай бүтээгдэхүүний экспортын боломжийг нээх болон “Монгол мал-II” арга хэмжээний хэрэгжилтийн өнөөгийн байдлын талаар” тавьсан асуулгын хариуг сонсч байна. 

Энэ үеэр УИХ-ын гишүүн Б.Пүрэвдорж "Малчдын гол орлого нь мах. Малыг амьдаар нь гаргах тухай асуудал яамны түвшинд яригдах боллоо. Ийм зүйл байхгүй шүү. Өмнө нь Ч.Улаан гэдэг хүн малыг амьдаар нь гаргах тухай яриад тэр хүний улс төрийн карьер нь дуусч байсан шүү. Хоёрдугаарт вакцин Туркээс авах боломж байна. Үүн дээр Туркийн Элчин сайдтай хамтарч ажиллаарай. Махны квот хүртээмжийн асуудал юм. Квотоос үүдэж авлига хээл хахуулийн асуудал гардаг шүү. Яамны хувьд усан боомтоор БНХАУ-ын хил рүү оруулах асуудлыг ГХЯ-тайгаа хамтраад ажил хэрэг болгомоор байна, ихэд хойрго хандаад байгаа. Маш олон байгууллага махны экспортод хяналт тавьж байна. Хилийн мэргэжлийн хяналтынхан гааль руу явсан. Гааль дээр дөрөвхөн хүн ажиллаж байна. Тэр дөрвөн хүн үйлдвэрүүдэд очиж ажиллах нь байтугай гэрчилгээ бичиж амжихгүй байх жишээний" гэв.