Хөтөлийн цемент шохойн үйлдвэр ХК-ийн захирлын үүргийг түр орлон гүйцэтгэгчээр Л.Наранбаатарыг томиллоо

Хөтөлийн цемент шохойн үйлдвэр ХК-ийн хувьчлалыг хүчингүй болгож, төрийн өмчид авах шийдвэрийг Лхагва гаригт Засгийн газрын хуралдаанаар гаргасан. 

Уг шийдвэрийн дагуу өнөөдөр /2022.03.25/Төрийн өмчийн бодлого зохицуулалтын газрын удирдлагууд тус үйлдвэрт очиж ажиллаж байна.

Энэ үеэр Төрийн өмчийн бодлого зохицуулалтын газрын Б.Цэнгэл тус үйлдвэрийн гүйцэтгэх захирлын үүрэг гүйцэтгэгчээр Лүндэгийн Наранбаатарыг томилж буйг танилцууллаа. 

Энэ үеэр Хөтөлийн цемент, шохойн үйлдвэрийнхэн Засгийн газрын шийдвэрийг эсэргүүцэж байгаагаа илэрхийлэхэд,  Төрийн өмчийн бодлого зохицуулалтын газрын Б.Цэнгэл "Хуулийн хүрээнд энэ асуудлыг шийдэж байна. Эзэнгүй өмчөө төр авна. Та бүхэнд шүүхдэх эрх нээлттэй байгаа. Үйлдвэрлэл үйл ажиллагаагаа явуулж байгаа явдалд бид баяртай байгаа" гэв.

Сануулахад, 2015 онд Хөтөлийг сахал Д.Эрдэнэбилэгийн талынхан авахдаа маш бага үнэлгээгээр буюу төрийн эзэмшлийн 11.9 тэрбум төгрөгийн үнэлгээтэй 119,452,690 ширхэг хувьцааг 1.4 тэрбум төгрөгөөр  хэтэрхий бага үнээр үнэлэн худалдан авахдаа хэд хэдэн хуулийг зөрчсөн байдаг. 

Түүнчлэн “Бейзмент” ХХК нь өмч хувьчлалд оролцохоос өмнө Худалдаа хөгжлийн банкнаас авсан 34 сая, хятадын CHIMEG компаниас авсан 21.5 сая ам.долларын зэрэг нийт 61.0 сая ам.долларын зээлийг Хөгжлийн банкнаас авсан зээлийн эх үүсвэрээр барагдуулсан. Өөрөөр хэлбэл, төрийн өмчийг хууль бусаар үнэгүйдүүлж авч улмаар Хөгжлийн банкнаас зээлсэн мөнгөө Эрдэнэтийн төлбөрт төлсөн зэрэг луйврын схемтэй төр ийнхүү тэмцэж төрийн өмчөө буцаан авч байна. Хөтөлийн цементийн 295 тэрбум төгрөгийн өрийг төр төлөхгүй, Хөтөлийн цементийнхэн өөрсдөө төлөх үүрэг хүлээх юм.