УИХ-ын гишүүн Х.Булгантуяа, Х.Ганхуяг нар Хөрөнгө оруулалтын тухай хуулийн төслөө буцаан татлаа

Өнгөрөгч намрын чуулганаар хэлэлцсэн Хөрөнгө оруулалтын тухай хууль нь багагүй шүүмжлэл дагуулж, хэлэлцүүлгийн явцад санаачлагч гишүүдийн хоёр нь ч нэрээ татаад байсан юм. 

Тодруулбал, УИХ-ын гишүүн Х.Ганхуяг, П.Анужин, Х.Булгантуяа, Д.Өнөрболор нарын дөрвөн гишүүний боловсруулсан уг хуулийн төслийг УИХ-аар хэлэлцэх эсэхийг нь дэмжээд байсан боловч  хоёр нь буюу П.Анужин, Д.Өнөрболор  тус хуулийн төслөө буцаан татахаа мэдэгдсэн.

Хууль санаачлагчдын 50 хувь нь нэрээ татаж, хуулийн төсөлд оролцохгүй гэдгээ мэдэгдсэн тохиолдолд хууль хэрхэх нь тодорхой бус байсан юм. 

Учир нь “Дэгийн тухай хуулийн дагуу хууль санаачлагчдын олонх нь  нэрээ татаж, оролцохгүй гэсэн тохиолдолд тус хуулийн төслийг хэлэлцүүлгийн аль ч шатанд байсан эгүүлэн татдаг.

Тэгвэл УИХ-ын гишүүн Х.Ганхуяг, Х.Булгантуяа нар өргөн мэдүүлсэн Хөрөнгө оруулалтын тухай хуульд өөрчлөлт оруулах тухай хуулийн төслөө татан авч байгаа талаар УИХ-ын дарга Г.Занданшатар өнөөдөр /2022.03.25/ чуулганы хуралдааны үеэр мэдэгдлээ. Ингэснээр тус хуулийг санаачилсан гишүүд бүгд  татах хүсэлтээ илэрхийлсэн тул хуулийн төсөл буцаагдав.

Тус хуулийн төсөлд: 

2.1.5.Монгол Улсад хөрөнгө оруулалт хийсэн гадаадын хөрөнгө оруулагч, түүний гэр бүлд Монгол Улсад зорчих олон удаагийн орж, гарах визийг холбогдох хууль тогтоомжийн дагуу олгох;

12.1.6.гадаадын хөрөнгө оруулагч, түүний гэр бүл Монгол Улсад хувийн хэргээр оршин суух хүсэлт гаргасан тохиолдолд 50 мянган америк доллар буюу түүнтэй тэнцэх хэмжээний төгрөгөөс дээш хөрөнгийг Монгол Улсад хөрөнгө оруулалт хийснийг үндэслэн олгох зэрэг өөрчлөлтийг тусгаад байсан юм.