Ж.Батсуурь: Надад эв нэгдлийг хангах жор бий

Ардчилсан намын  даргын сонгуульд нэр дэвшигчид  өнөөдөр /2022.03.18 /дөрөв дэх аймагтаа  ажиллаж байна. Тодруулбал, Ардчилсан намын даргын сонгуульд нэр дэвшигч Халтмаагийн Баттулга, Жамбын Батсуурь нар Дорноговь аймгийн гишүүд, дэмжигчиддээ бодлого, мөрийн хөтөлбөрөө танилцууллаа. 

АН-ын даргын сунгаанд нэр дэвшиж буй Ж.Батсуурь  Ардчилсан намынхаа нэр хүндийг сэргээнэ гэдгийг тодотгоод тэрбээр гишүүд, дэмжигчид намын анхан, дунд шатны зовлон, жаргалыг мэдэрч ажиллаж ирсэн хүний хувьд УИХ-ын гишүүн Ж.Батсуурь намаа нэгтгэх, эв нэгдэлд хүргэж чадах нэр дэвшигч гэж итгэж байгаагаа илэрхийлж байв. Нэр дэвшигч Ж.Батсуурь “Надад эв нэгдлийг хангах жор бий. Ардчилсан намынхаа нэр хүндийг сэргээж, улмаар улс төрийн сонгуульд ялалтын тугаа мандуулах болно” хэмээгээд мөрийн хөтөлбөрөө танилцуулж, уулзалтад оролцогчдын санал хүсэлтийг сонслоо.

Ардчилалд хайртай, ардчиллыг дэмжигч олон мянган гишүүд дэмжигчдийнхээ үзэл санаа, үнэт зүйлийг тууштай хамгаалахын төлөө нэр дэвшин өрсөлдөж буй Ж.Батсуурьт амжилт хүсэв.