МАН-ын генсек Д.Амарбаясгаланг намын гишүүддээ хариуцлага тооцохыг шаардлаа

Хэвлэл мэдээллийн редакцууд  нэгдэн МАН-ын Ерөнхий нарийн бичгийн дарга Д.Амарбаясгаланд Хөгжлийн банктай холбогдсон намынхаа гишүүдэд хариуцлага тооцох шаардлага хүргүүлэхээр болсон.

Тус намын Ерөнхий нарийн бичгийн дарга Д.Амарбаясгалан албан ажлаар орон нутагт ажиллаж буй тул шаардлагыг өрөөнийх нь үүдэнд нааж үлдээлээ.

Эргэн сануулахад МАН-ын Ерөнхий нарийн бичгийн дарга Д.Амарбаясгалан авлига албан тушаалын хэрэгт хатуу тэмцэх талаар ярьж байв. Тэрбээр Хөгжлийн банктай холбоотой асуудалд иргэний нийгмийн байгууллагууд хэвлэл мэдээллийн хэрэгслүүдтэй хамтран улс төр, ёс суртахууны дарамт үзүүлэн ажиллах байр суурийг илэрхийлсэн юм. Мөн МАН дүрмээрээ намын гишүүд хуулийн хэрэг үүсгэн шалгагдаж байгаа бол намаас түдгэлзүүлэх, шүүхээс гэм буруутайг нь тогтоовол намаас хасна гэж заасан. Энэ дагуу МАН-ын гишүүн албан тушаалаа ашиглан Хөгжлийн банкнаас зээл аван залилсан нь шүүхээр тогтоогдвол албан тушаал харгалзахгүйгээр намаасаа хасах талаар тодорхой мэдэгдсэн.

Сэтгүүлчид нэгдэн өмнө нь Хөгжлийн банкны удирдлагууд болон тус банкны зээлдэгчийг хамруулан "Өөрөөр нь төлүүлье" хэлэлцүүлгийг зохион байгуулсан. Дараагийн хэлэлцүүлгийг энэ сарын 29-нд товложээ.