Өрх толгойлсон эмэгтэйг 720 мянган төгрөгийн зээлээ төлөхийг шаардаж хүүхдийн мөнгө, халамжийн дансуудыг нь хаажээ

Өнгөрөгч гуравдугаар сарын 09-ний өдөр ШШГЕГ-аас СХД-ийн 24 дүгээр хорооны иргэн дөрвөн хүүхэдтэй, өрх толгойлсон эмэгтэй Б.Урнааг Юнител компаниас 2019 онд авсан 720 мянган төгрөгийн зээлээ төлөхийг шаардсан албан бичиг иржээ. Улмаар маргааш нь буюу гуравдугаар сарын 10-ны өглөө түүний дөрвөн хүүхдийн данс, тэжээгчээ алдсаны тэтгэмж авдаг дансыг нь хаасан байна. Тиймээс үүнээс өөр орлогогүй болсон эмэгтэй манай редакцитай холбогдон төрөөс үр, хүүхдүүдэд минь олгож буй мөнгийг булааж, хүүхдүүдийн минь эрхэнд халдаж, хоногийн хоолноос минь салгаж буй байдлыг шийдвэр гаргагч нарт хүргэж өгөхийг хүсэж хандсан юм. 

Б.Урнаа 35 настай, өмнө нь нөхрийн хамт автобус баазад ажилладаг байсан ч зүрх, бамбай булчирхайн өвчтэй болсноор одоогоор ажил хийх боломжгүй СХД-ийн 24-р хороонд 2-11 насны дөрвөн хүүхдийн хамт аж төрж байна. Түүнд өнөөдөр бэлэн мөнгө байтугай хоногийн хоолны мөнгө алга. Тэрээр хүүхдийн мөнгө, халамжийн мөнгөөрөө хүүхдүүдээ тэжээдэг бөгөөд ойр хавийн дэлгүүрүүдэд зээл тавьж, зээлээс зээлийн хооронд өдөр хоногийг өнгөрүүлж байна. 

Холбогдох: Б.Урнаа 80124910