З.Мэндсайхан: Тариаланчдад 6.5 тэрбум төгрөгийн шатахууныг 50%-ийн урьдчилгаа төлбөртэйгөөр олгоно

Өнөөдрийн Засгийн газрын хуралдаанаар эх орны эрүүл хүнс хөтөлбөрийн хүрээнд атрын дөрөвдүгээр аяныг өрнүүлэхээр шийдвэрлэлээ.

Анх удаа МУ-ын ЗГ-аас хүнсний ногоо тариалагчдад тариалалтаас намрын ургацын дүнгээр стандартын шаардлага хангасан ил талбайн таримлуудад тонн тутамд 100.0 мянган төгрөгийн татаас өгөхөөр шийдвэрлэлээ. 

Мөн хүлэмжийн аж ахуй эрхэлдэг ААН-үүдэд  аравдугаар сарын 15-наас тавдугаар сарын 1-ний хооронд эрчим хүчний хөнгөлөлт үзүүлэх цагийг оройн 18:00 цагаас өглөөний 06:00 цаг болгож хөнгөлж байна. 

Түүнчлэн хаврын тариалалт, намрын ургац хураалтад нийт 22.5 мянган тонн шатахуун шаардлагатай гэж тооцсон байна. Харин хаврын тариалалтад зориулж нийт 6.5 тэрбум төгрөгийн шатахууныг хөнгөлөлт болгож гаргахаар болж, үүнийг 50 хувийн урьдчилгаа төлбөртэйгөөр олгоно гэдгийг ХХААХҮ-ийн сайд З.Мэндсайхан хэллээ.