АН-ын даргын сунгаа эхэлж, Х.Баттулга, Ж.Батсуурь нар нэр дэвшигчийн үнэмлэхээ гардлаа

Ардчилсан намын даргын сунгаа дөрөвдүгээр сарын 6-нд болно. Тэгвэл өнөөдөр /2022.03.16/ УИХ-ын гишүүн Ж.Батсуурь, Ерөнхийлөгч асан Х.Баттулга нар нэр дэвшигчийн үнэмлэхээ гардан авлаа.

Энэ үеэр "АН-ын даргын сонгуулийг ардчилалтай байх, сонгодог парламенттай байх уу, үгүй юу гэдэг утгаар харах хэрэгтэй. Өнөөдөр төрийн гурван өндөрлөг хэт олонхи буюу нэг нам дангаар сууж байна. Тиймээс энэ сонгууль маш чухал юм" хэмээн нэр дэвшигчийн үнэмлэхээ гардан авах үеэрээ онцолсон юм. 

Тэгвэл нэр дэвшигч Х.Баттулга сэтгүүлчдийн асуултад "Энэ удаагийн сонгууль АН-ыг эв нэгдэлтэй байлгахын тулд болж байна, үе үеийн ерөнхийлөгчид хоорондоо эв нэгдэлтэй байх учиртай, АН-ын даргын сонгуулийн үр дүнг Дээд шүүх хүлээн зөвшөөрөх ёстой, харин Хөгжлийн банкны зээлийг надтай холбох ямар ч үндэслэл байхгүй, олон зөвлөх бий, МоАХ-ын алга дарам газрыг 50 тэрбумаар барьцаалж зээл өгөх ямар ч тэнэг банк байхгүй. Бүтэн жил намайг гүтгэж, дайрч байна. Наад чинь бүгд гүтгэлэг" хэмээн хариулсан юм.

Харин нэр дэвшигч Ж.Батсуурь " Улс төрийн нэг нам монополь тогтоож байна. Бид бүхэн энийг засч, залруулах ёстой. Тиймээс би нэрээ дэвшүүлсэн.  Өнгөрсөн 32 жилийн түүхэнд Ардчилсан нам үндсэндээ ялж, олонхи болж байгаагүй. Тиймээс миний бие олонхи болж, ялахын төлөө зүтгэнэ. Ард түмний 60 орчим хувь нь биднийг дэмжинэ гэдэгт эргэлзэхгүй байна" гэсэн юм.