МАН-ын Удирдах зөвлөл хаалттай хаалганы цаана Хөгжлийн банкны асуудлыг ярьжээ

УИХ-ын хаврын ээлжит чуулган өчигдөр /2022.03.15/ нээлтээ хийж, улмаар УИХ-ын чуулганы эхний хуралдаанаар үндэсний аюулгүй байдлын талаарх асуудлыг хаалттай хэлэлцсэн. 

Үүний дараа МАН-ын Удирдах зөвлөл хуралдаж, Хөгжлийн банкыг хэлэлцжээ. Тодруулбал улс төрийн өндөр  албан тушаалтнууд мэдээлэлд ойр байдлаа ашиглаж, Хөгжлийн банкнаас зээл авч улмаар зээлээ төлөөгүй нэр бүхий гишүүддээ хариуцлага тооцох асуудлыг хөндсөн байна. 

Энэ үеэр ЗГХЭГ-ын дарга Ц.Нямдорж хүний, өөрийн нам гэж ялгаварлалгүйгээр хариуцлага тооцох нь зөв. Зээлээ төлсөн байлаа ч гэсэн хариуцлагаас мултрах ёсгүй гэсэн байр суурийг тэрбээр илэрхийлжээ. 

Хөгжлийн банкнаас 2019 онд 61 тэрбум төгрөгийн зээл авсан гэх “Вестерн Холд” ХХК-тай нэр холбогдож буй УИХ-ын гишүүн С.Бямбацогт  намынхаа Удирдах зөвлөлийн хуралдаанаар “Вестэрнхолд ХХК”-ийн хэрэгжүүлж буй Ховд-Эко цемент бол хөгжлийн төсөл. Энэ төсөл баруун бүсэд барилгын материалын үнийг бууруулах,  хэдэн зуун хүн ажил орлоготой, болгож буй  цементийн үйлдвэр баригдах ёстой. Энэ хүрээнд хийгдэж байгаа ашигтай төсөл. Харин авсан зээлээ зориулалтын бусаар зарцуулж, хугацаанд нь төлөхгүй, төр, ард түмнийг хохироож байгаа бол тэр гэмт хэрэг" гэж хэлжээ. 

Хөгжлийн банкны гүйцэтгэх захирлаар ажиллаж байсан Г.Амартүвшингийн тухайд мөн Удирдах зөвлөлийн хурал дээрээ үг хэлж,  “Би Хөгжлийн банкны захирлаар ажиллаж байсан зургаан сарын хугацаандаа зээл олгоогүй. Гүйцэтгэх захирал дангаараа ямар ч зээл шийдэх боломжгүй байдаг. ТУЗ, зээлийн хороод нь шийддэг” гэж ярьсан байна. 

Харин МАН-ын дарга Л.Оюун-Эрдэнэ, генсек Д.Амарбаясгалан нарын хувьд "Хөгжлийн банкны чанаргүй зээл бол эрх барьж байгаа намын хувьд хоолой дээр тавьсан хутга болоод байна. Энэ зээлийг төлүүлэхгүй бол улсаараа дампуурах эрсдэл үүснэ. Эрх барьж байгаа намын хувьд онцгой анхаарал хандуулах ёстой. Хөгжлийн банкны чанаргүй зээлдэгчдийн асуудлаар намаас гаргасан мэдэгдлээ ажил хэрэг болгохын төлөө ажиллана. Нийгэм ч шаардаж байна. Нийгмийн бухимдлыг хамгийн их төрүүлж буй энэ асуудлыг зүгээр өнгөрөөхгүй" гэж тэд хэлжээ. 

Үүнийг МАН-ын залуу гишүүд ч дэмжиж, хариуцлага тооцох нь зөв. Энгийн бизнес эрхлэгчдэд олдохгүй зээлийг албан тушаалаа ашиглаж авсан хүмүүст хариуцлага тооцох ёстой гэдгийг Н.Учрал тэргүүтэй залуу гишүүд нь тодотгожээ. 

Сануулахад, МАН-ын Хяналтын ерөнхий хорооноос Хөгжлийн банкны асуудлаар С.Бямбацогт, Г.Амартүвшин, Х.Ганхуяг, Г.Дамдинням, М.Билэгт, А.Сүхбат нарын нарын найман хүнээс албан тайлбар авсан байдаг.